要聞港聞

虐兒案疫下飆升 世道差難覓溫馨

正所謂:「相見好,同住難!」一家人縱使有親情聯繫,甚至有血緣關係,假如性格不合,住埋一齊都容易多爭執、多拗撬;喺呢啲時候,保持適當嘅私人空間就顯得非常重要!並唔係話要老死不相往來,之不過「小別勝新婚」,維繫感情都唔使朝夕相對,夫妻適用,父母同子女之間都適用!只可惜,香港啲樓愈起愈細間,莫講私人,就連空間都唔多夠,再加上嚴厲嘅防疫措施,小朋友返唔到學,大人又上唔到班,全家被困屋企,十足「困獸鬥」,想唔嗌交都幾難!
動口事小,動手就事大!一旦動手動腳,變成家暴案、虐兒案,最後只會搞到受害者承受創傷,施暴者遭受牢獄之災,可以話係一失足成千古恨!之不過,好多事都係說易行難,畢竟人係有情緒,家長都唔例外!遇着小朋友太活潑、唔聽話,家長少啲忍耐力都容易扯火;加上現時經濟不景,家長仲要承受各方面嘅壓力,更容易一時火遮眼!例如被迫在家工作嘅時候,小朋友繼續嘈喧巴閉,家長點會唔發火呢?太多太多因素結合埋一齊,卒之導致近年嚟嘅虐兒案數字急劇飆升!
呢嗱!有專家尋日喺大氣電波透露,當局去年接獲1,360宗懷疑虐兒案,比起前一年足足上升咗五成,當中接近一半屬於身體傷害!而喺疫情之下,由醫院發現嘅懷疑虐兒案件亦增加約四至五成;原因好可能因為喺嚴厲嘅社交距離措施限制之下,有需要嘅家庭難以到機構尋求協助,社工可以接觸受害人嘅機會大幅減少,再加上疫情下頻頻改上網課,老師難以察覺學生嘅情緒轉變,最終搞到個小朋友被「打到入院」,或者身體變差而求醫,先由醫生揭發事件!
雖則好多慈善機構已經因應疫情,改變支援手法,例如鼓勵親子活動,向個案家庭寄送禮物包同遊戲包等等,但顯然效果有限。至於港府喎,面對愈嚟愈多嘅虐兒案,並唔係置之不理嘅,都有計劃修例,設立強制舉報機制;之不過做得唔足夠囉,先唔講呢個強制舉報機制有轉嫁責任之嫌,容易令前線工作者誤墮法網;去到舉報階段,意味着虐兒已經發生,出咗事先補鑊,當然唔理想啦!
除咗強制舉報虐兒之外,港府查實仲有好多嘢可以做!例如港府可以加大對慈善組織機構嘅資助,以便機構可以有更多資源,用於支援有需要家庭之上;港府亦可以興建、改建更多社區服務中心、託兒所之類,減輕家長嘅育兒壓力!最重要嘅,當然係推動經濟復甦,推動社會復常!單單係社會恢復常態,市民可以正常生活,已經唔會有咁多曲折離奇嘅悲劇發生;假如連經濟都復甦埋,港人可以安居樂業,唔再有「貧賤夫妻百事哀」,邊仲有咁多虐兒案會發生呢!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500