要聞港聞

大案細案日日有 毒品攻陷全香港

各位,知唔知「桂姐賣布,一疋還一疋」點嚟㗎?民間故事係咁講,話說小商販桂姐賣布,因為顧客多,照顧不過來,佢於是高叫:「一疋還一疋。」廣州話「一疋」諧音「一筆」,表示帳目一筆歸一筆,咪搞亂!
呢,功夫茶諗起呢則故事,皆因畀啲毒品快餐車搞到好亂,唔知邊筆歸邊筆!日前黃大仙警區特遣隊及特別職務隊中午喺彩虹邨進行反罪惡巡邏,巡至綠柳路露天停車場時,發現一輛私家車停泊路邊,車上兩名男子形迹可疑,遂上前截查,喺私家車上檢獲約33克懷疑氯胺酮(K仔)以及約39克懷疑可卡因,市值共約5.3萬元。兩名分別27歲姓陳及29歲姓何男子涉嫌販毒被捕,現正被扣查。
話口未完,尋日凌晨一時許,警方馬鞍山分區特遣隊巡經恆星樓對開,發現路旁一輛平治房車,車內20餘歲男司機神色慌張,於是上前截查,又喺車內司機手枕位搜出約106小包、總值約2.8萬元懷疑毒品可卡因以及兩萬元現金。阿哥,呢啲毒品快餐車都真係好似桂姐賣布,只不過唔係一筆還一筆,而係一包還一包啫!睇怕供應全港九新界,「生意」唔錯喎!否則點會日日有,前日有,尋日有,今日又有!這不是如「山陰道上,應接不暇」嗎?
見微知著,香港儼然淪為毒港!細如毒品快餐車,梗有一架喺路上!之不過,警方就捉「雞仔」,海關就捉「麻鷹」。呢嗱!有數字話畀大家知。香港海關喺今年上半年,於赤鱲角香港國際機場共偵破332宗毒品案,檢獲共1.16噸、市值近6億元毒品,以檢獲毒品重量及貨值計算,與去年同期比較均大幅上升,當中包括約576公斤冰毒,較去年同期檢獲量上升近12倍。
各位,畫公仔都唔使畫出腸咯啩!市民都會有疑惑:點解海關咁神勇,偵破嘅毒品大案動輒億億聲,而警方有專門毒品調查科,每年又花耗逾億元線人費,理應掌握更精準情報,何以緝獲嘅只係細眉細眼嘅幾皮嘢貨色,反觀海關一掃就中、一掃就有,全部以億億聲計!阿哥,作為守我城嘅帶勇之人不老貓燒鬚嗎?
香港回歸逾25年,問題係市民見到警方反黑掃毒叫到震天,之但係警方掃毒同海關相比,蚊髀同牛髀,講出嚟都羞家!仲有吖,拉嘅好多時都係啲後生仔女,相信係「替死鬼」居多,真正黑幫大佬卻永遠逍遙法外!此外,好似荼毒青少年嘅樓上吧,又係掃極都有,會唔會係假掃場,真販毒,成為黑幫收入來源?法治之區藏污納垢,難怪社會唔少聲音質疑是否有警員充當黑幫保護傘,空穴來風必有因也。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500