要聞港聞

笑看天下:重點打擊 一改陋習

紅棗巢皮心未老!各位街坊,清潔香港運動又起錨啦!今趟肯定唔係打一場大風而只拾兩塊落葉!今次誓要深入鼠穴盡殲鼠子,深入全城600衞生黑點將佢哋「漂白」,說不定黑點變「桃花源」,沒有垃圾污水,矚目盡是花香鳥語,舊區變新貌,換了人間,香港名正言順係「香港」而非「鼠港」、「臭港」!
各位,並非發夢,係真㗎!今日政府開始全城打擊衞生黑點,為期3個月。嗱!過去本報為民請命,多番報道油尖旺、三無大廈等藏污納垢,可惜過去政府未見有乜特別行動。呢嗱!新一屆政府上任後,新成立嘅跨部門「地區事項統籌工作組」,由政務司副司長卓永興帶領,政府會動用財政預算案嘅5億元撥款,展開有關計劃,並制訂關鍵績效指標(KPI),行動要「以深圳為目標」。
首階段為期3個月,將重點打擊全港600多個鼠患、非法棄置垃圾等衞生黑點,甚至清拆棄置招牌、191條公屋屋邨同步大清潔等。喺滅鼠方面多管齊下,如設立19隊夜間防治鼠患流動隊喺深夜捕鼠、使用「T型鼠餌盒」取代懸掛式鼠餌袋、喺公屋加裝防鼠及捕鼠裝置、舉辦防治鼠患講座等。咁多動作,畀大家睇到嘅,起碼政府今趟與老鼠誓不兩立,捕鼠決心可謂「心潮逐浪高」。而日夜圍剿,相信鼠屍必定遍巷橫街,若然,堪稱回歸以來老鼠之首趟大浩劫,大家即管拭目以待!
清潔香港運動搞咗大半個世紀之所以失敗,論者都指出係部門權責不清,而且每次無不予人「為做騷而做騷」,尤其食環署執法不力又hea做,在上冇監督,下面求其做,捉鼠自己變懶蛇,變為「蛇鼠一窩」!今以重點打擊,政策毋庸置疑,問題係要誠心摯意、持之以恒及做好監導,才可望有成效。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500