政情：唔想鄉民等得耐 陳月明墊支派福袋

陳月明話，每年都會為鄉民送上福袋，當做慈善活動。由於今年佢除咗原來嘅區議員職務，又多咗立法會議員嘅公職，成為雙料議員自然每個月都出多一份糧。有見疫情再度肆虐，今次索性豪爽啲，自己拎咗約10萬蚊準備福袋以及額外添加一啲防疫物資，所以今年個福袋較往時係會「大份啲」咁話。

之不過，立法會開爐至今未到一個月，糧都未出，咁咪等同墊支？佢就話唔緊要喎，反而等到出第一個月糧，都過咗農曆新年喇！佢仲話鄉民好重視傳統節日，依家莫講話舉辦大型活動，連基本嘅「還神」都做唔到呀，所以都想快啲將福袋送到鄉民手上，以紓緩大家失落嘅情緒咁話。