政情：做老闆煩惱多 朱江瑋嘆有錢賺係虛火

朱江瑋話有街坊不時問佢，到底開舖搵唔搵到食㗎？佢好坦白咁話「好難」，尤其係自己呢啲唔適合做生意嘅人，成日覺得賺人錢個心好唔好意思，每次加價都好似罪大惡極，咁實搞唔掂啦。但幸好佢遇到嘅客人都幾疏爽，買嘢唔睇銀碼，有時仲唔使找錢添！結果佢間舖經營唔夠兩個月，請埋伙記之下都可以達到收支平衡。但佢相信呢啲都只係「虛火」，擔心農曆新年過後先至係真正嘅捱世界。

佢又提到，有當區嘅街坊肯幫佢做伙記，喺佢創業最困難之時出手相助，仲要返工準時放工例牌遲走，大讚咁嘅同事真係唔知邊度搵。只不過呢位同事只應承做到年尾，將來係點，將來先再算。

雖然創業短時間內回到本，但佢話過咗農曆新年等盤生意穩定咗就會出去搵工，認為打工收入會高過開舖做老闆喎。