周秀娜傷患多 自備「求救」list 張敬軒變身Super J 貪新忘舊有運行

張敬軒、周秀娜、倪晨曦、ANSONBEAN及劉俊謙等昨日出席活動，最近與玄學家七仙羽拍攝節目的軒仔自爆對方為他起名「Super J」，他笑說：「嗰日喺柴灣，佢就叫我『柴灣Super J』，簡稱『柴J』，佢啲嘢冇得解，唔知佢知唔知個J字係咩意思呢？（講中咗？）承佢貴言啦！」

樂壇頒獎禮將至，軒仔笑言有問對方攞得獎秘笈：「佢叫我保持平常心，叫我着多啲鮮色衫同用新嘢，令個人開朗紓緩壓力。」他又指今年是競爭大的一年，成個市場都好活躍，變得有動力，並說：「尤其我呢啲有一定年資嘅人，會刺激你要諗啲新嘢，唔好咁懶，都要撻番着副偈。」提到打入叱咤「我最喜愛的男歌手」8強，他指遊戲好玩：「有網友留言話其他入圍歌手嘅出道年資，加埋就等如我年資，一個頒獎禮有唔同年齡同年資嘅人喺度先健康。」近日不停拉票的他坦言，誰人得獎都會替對方高興，認為每一位付出的歌手都應該有回報。

周秀娜近年拍戲不時受傷，被封「容易受傷的女人」，前晚她在社交網透露膝蓋痛到行不到，急去睇醫生，她解釋因練習而觸傷舊患：「12月要拍兩套電視劇，其中一套有好多動作戲，咪搵武指練好動作先，點知整親左腳。」最搞笑是之前拍文戲亦出事，自嘲有多年受傷經驗，已儲下大批醫生名單，有事時可即時求救，她說：「要食多啲嘢長番啲肌肉去保護韌帶，大家可以多啲約我食飯呀！」