吳浩康莊思敏分手10年首合作馬思惠做打女楊天宇硬食200腳

英皇力捧新人馬思惠首次孭飛做電影女一，有意做打女的她為應付連場動作場面，特別接受訓練，楊天宇則自爆硬食對方200腳，搞到傷痕纍纍！而過氣情侶吳浩康與莊思敏分手多年，終於在戲中首次碰頭。

影壇新星馬思惠昨日到西貢出席英皇電影《裡應外合》的開鏡拜神儀式，同場還有楊天宇、周家怡、吳浩康、莊思敏、張繼聰及余安安等，英皇集團主席楊受成更親臨現場支持。首次擔正電影主角的思惠和天宇，視壓力為動力，剪了短髮的思惠希望走打女路線，戲中不停起飛腳「侍候」天宇！

險踢中要害

天宇透露有不少高難度動作，搞到周身傷，即場展示肩膊和頸部傷勢。他笑言思惠腳法好，險被踢中要害：「好彩佢係踢中重要部位嘅旁邊，有個動作佢連踢我3腳，加埋都有200下！」思惠表示踢傷對方，既內疚又害怕，並自爆曾拉傷：「落地踩唔穩變咗一字馬，好彩唔係太傷。」

吳浩康（Deep）與舊愛莊思敏分手10年，首次在電影碰頭，2人有講有笑，合照時零尷尬，更大方一齊受訪，思敏坦言私下有跟對方見面：「冇芥蒂，都過咗咁耐。」不過透露與Deep沒對手戲。問到可接受演情侶？他們齊聲說：「到時再算。」問Deep是否單身？他說：「等事業好啲先拍拖。（有冇聯絡緋聞女友郭思琳？）有。」隨即自爆早前做了鼻竇手術，割去息肉及發炎組織：「做完手術通番好多，過去3、4年要用口抖氣同呼吸，其實一直想做手術好耐，但每次都咁啱有嘢做，依家冇晒鼻水倒流、胃酸倒流，對唱歌好好多。」