姚焯菲話喊就喊 炎明熹咇唔出眼淚 靠紙巾交戲

Gigi、姚焯菲（Chantel）及朱敏瀚等昨午為無綫新劇《青春本我》開工。Gigi被安排拍攝一場失貓喊戲，性格硬朗的她卻「喊唔出」，要導演在旁引導，最後亦只是用紙巾交代拭淚動作。事後她說：「我好少喊，平日即使想喊都會叫自己唔好，可能今日太多鏡頭都有影響。我幾take都喊唔出，多謝導演循循善誘冇嫌棄。」問Gigi可考慮上演技課增值自己，她說：「都會，唔知點解要喊嘅時候喊唔出，但唔拍時我又喺度喊，好想打自己！」

而同日Chantel亦拍喊戲，相對順利，她說：「交代我望住隻公仔，好唔開心咁喊。」記者叫她「幫」Gigi，Gigi搶說：「冇用，頭先我係鼻水流先，兩行嘢好核突。」問到拍劇是否好玩？Gigi說：「有難度。（好攰？）今日唔算，之前試過夜晚有嘢做，第二朝好早起身，對眼腫晒。」即將要測驗及考試的她說：「如果連呢兩樣都克服，我可以迎接更大挑戰。」

另外，飾演老師的朱敏瀚被取笑終於「有衫着」，他說：「呢兩、三年嚟第一套劇集唔使除衫，天氣開始凍，着多啲衫好。」談到求學時期趣事，他笑說：「初中時大家覺得我個樣比較特別，因為太婆係英國人，所以同學仔鍾意望吓我。（暗戀老師？）小一時同個女老師好friend，後來我出席佢婚禮，感覺好似畀人攞走咗個姐姐咁！」

對於有傳《青》劇邀請殿堂級音樂人林子祥及顧嘉煇客串，監製彭幼芳斷言否認︰「係搵人客串，但唔係呢兩位。」