產經

絲絲講場:資訊科技人才勢有「錢」途

疫情肆虐下有工開已偷笑,打工仔想進修不妨望吓咩工最渴市。噚日台灣人才資源服務網站一零四資訊科技發布「2021年10大新興熱門職務」,論5年內職位增長前3名依次係數碼轉型專家、客戶成功經理(CSM)同數據科學家,月薪平均7萬元新台幣(約1.96萬港元)。
數碼轉型專家最渴市
數碼轉型專家係幫傳統行業用互聯網改善研發、生產、銷售等工作流程,過去5年來職位多咗超過9倍。CSM都係湊客,關鍵在於度橋幫助客仔做大盤生意,過去5年職位增長8倍。數據科學家就係將雜亂無章嘅大數據變成有用資訊,過去5年來職位增長2.84倍。
其實上榜工種好多都同IT(資訊科技)有關,如數碼安全工程師、開發醫療人工智能應用嘅「生理信號工程師」、識得將一個軟件系統由介面執到落數據庫去提高效益嘅「全端工程師」(Full-Stack Engineer)、搞虛擬實境(VR)同擴增實境(AR)嘅「沉浸式體驗工程師」,上述工種過去5年職位都多咗一倍。
咁對電腦科學一竅不通嘅話咪死得?No!原來網上互動教師過去5年職位增長超過兩倍,月入平均4.11萬元新台幣(約1.15萬港元),大把先生同專業人士靠佢「秘撈」。而幫助企業開拓新市場同拉新客嘅商務拓展經理,月薪平均7.85萬元新台幣(約2.2萬港元)。
雖然以上月薪係按台灣嘅物價得出,香港人可能嫌低,但用嚟參詳吓未來趨勢絕對無壞!
余絲韻
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500