政情：欠債張秀賢劣迹斑斑 黃之鋒：10年前有迹可尋

黃之鋒強調，唔少報道簡述張係前學民成員，以及「曾與黃之鋒並肩」，查實學民思潮運作將近5年，張只係待過一年半左右。至於點解10年前有迹可尋？黃就話早喺2013年入秋前後，正值學民內部職位嘅換屆選舉，當時張秀賢未能連任學民發言人，期間發生兩件事情值得斟酌，其一係張喺書展經「Roundtable」推出新書《90後是咁樣的》文集，當中八成輯錄文章都係來自多位學民成員撰寫，然而所得版稅卻由張一人淨袋，惹起組織內非議；其二喺換屆投票前嘅質詢環節，張既不承認亦不否定自己有跟建制陣營嘅「中間人」打交道，遭同儕質問「你點睇被統戰收編？」事隔多年黃仍記得張回應時含糊其詞，支吾以對卻又情緒激動，結果落選後就退出學民。

黃又話到咗2014爆發違法佔領中環行動（佔中），期間同政府官員面談嘅5個學聯代表並唔包括張秀賢，張當日只擔任集會司儀，據悉亦因為有同輩擔心張同「中間人」過從甚密有關。喺佔中後知道有關資訊，黃亦感不解同驚訝，點解張喺學民同學聯先後都出現「金錢爭議」同「建制往來問題」，之後對此更加謹慎。

去到2017年尾，張參加新界東補選嘅民主派初選，黃選擇支持另一候選人，部分「支持學生、支持年輕人」嘅長輩問佢點解唔為同門出身嘅張站台？當時黃為保陣營團結，認為公開評價其他人嘅品格、直斥張嘅不是，並唔太合適。但時至今日，債主湧現兼任職親中機構曝光後，黃就想到若果以前表明對張嘅睇法，會唔會少啲人「中伏」呢？