要聞港聞

播黑暴歌難容忍 港府反擊要夠狠

細路仔都識得講︰「道歉有用,仲要差佬做乜?」況且唔係錯一次半次,而係接二連三,真係可以叫做巧合咩?講緊嘅係日前喺阿聯酋杜拜舉行嘅「2022亞洲經典健力錦標賽」,主辦方亞洲健力聯盟又將黑暴歌當成中國國歌播放,好彩運動員醒目,即時打出「T」字手勢叫停,主辦方先識得改正。點解用個「又」字,皆因明明喺亞洲七人欖球賽南韓站嘅時候,已經發生過類似事件,當時可以話係震驚世界,連國際媒體都有報道。第一次仲勉強可以話係工作人員無知,一時失誤,第二次都咁講,大家話可唔可信呢?
功夫茶覺得毫無道理!首先,香港運動員參與國際賽事已經有非常長嘅一段歷史,登上頒獎台亦非罕見,尤其喺亞洲賽事中,港隊可以話係奪獎無數!自回歸以嚟,當香港運動員奪冠、登上頒獎台之後,奏響嘅就係中國國歌,咁計至少都有25年歷史,有咩可能喺過去25年一直冇錯過,反而喺今年突然搞錯,而且唔單止一次呢?其次,喺亞洲七人欖球賽南韓站播錯黑暴歌嘅事件發生之後,港府反應之強烈,媒體報道力度之巨大,一早升級成為國際政治事件,體壇就算唔知詳情,至少都有所耳聞,又有咩可能一錯再錯呢?
最重要嘅係,主辦方事後聲稱係義工下載錯誤歌曲所致,但明明港隊喺比賽前就有提交正確嘅國歌聲音檔,何故啲義工有現成嘅唔用,甚至連聽都唔聽,反而要自己走去下載呢?再者,無論回歸之前抑或之後,香港都唔係一個國家,更無「香港國歌」可言,何解呢位義工會用「香港國歌」呢個概念上網搜索呢?唔通主辦方專門搵啲無常識嘅人擔任義工?事前何解又會冇人核對呢?舉辦一場國際賽事,所耗資源絕對唔少,唔通連請個職員核對都做唔到?
倘若話今次事件純粹係主辦方無心之失,主辦方應該公開追究提供黑暴歌來源嘅Google同YouTube,以示清白;同時聯合港府一齊向Google同YouTube要求修正!事實上,正正就係Google同埋YouTube一直放任假資訊流傳,先導致屢屢有網民被誤導;Google同YouTube好應該正視今次事件,修改演算法,避免錯誤資訊廣泛流傳!
所謂「人必自侮而後人侮之」,對於接二連三出現播錯國歌事件,好明顯就係因為港府喺上次事件發生之後,太容易接受對方道歉,事後僅將責任推畀港隊運動員造成嘅惡果!所以港府今次必須亡羊補牢,高度重視、嚴肅處理,並以強硬態度回應;正如港協暨奧委會義務秘書長王敏超都話,港府大可以向國際體育總會甚至奧委會反映事件嘅嚴重性,要求為國際賽事主辦單位制訂強硬同仔細嘅指引。理虧嘅唔係港府,又何必客客氣氣呢!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500