追討欠薪！愉園球員尋求足總協助
隨着合約正式完結，季內多次傳出被拖欠薪金的愉園球員，昨日到足總立案求助。會後發起人林毅東指球員至少「無出糧」半年，今次開會最主要目的是了解足總如何幫助一眾苦主，惟會後未有明確答覆，希望足總之後會更主動提供援助。
承諾找數兌現無期
「我都係第一次遇到呢個情況，其他年輕球員更加唔知點做，同球會完咗約到依家都未出糧，所以先上嚟足總溝通番整件事。」會後愉園球員林毅東向記者表明今次上足總的目的。愉園20多名球員，包括外援米基爾、查理史葛，以及剛簽約冠忠南區的盧斯安奴，昨日跟足總總幹事袁文川開會接近兩小時，惟「阿東」坦言由於足總並未有欠薪機制及明確指引，現階段只能夠繼續等待。為此，「阿東」希望足總能夠主動正視問題：「以往足總可能都經歷過唔同球會欠薪問題，呢一刻仲講要球員做主導，我覺得唔合理，希望嚟緊有實際行動幫手，唔使球員盲摸摸。」他認為足總至少要有指引，甚至提供援助金，保障球員生活，並透露下周一將舉行記招，公布球員的欠薪詳情，球員亦將於明日到勞工處備案。
足總主席兼愉園體育會會長貝鈞奇早前透露，目前仍與「足主」愉園足球部主任陳志實保持聯繫，對方承諾會承擔拖欠的薪金，惟何時兌現依然未明。貝主席重申欠薪問題應由愉園足球部與勞工處斡旋：「呢啲係球會嘅事，足總亦會同球會傾，但畢竟牽涉到勞工條例，咁要由勞工處同愉園足球部負責人溝通。」李浚湣報道