香港愛爾蘭混血兒謝家強早前正式加盟傑志，惟因疫情一直未向球隊報到。據其Instagram照片顯示，這名28歲中堅周四（11日）已經由馬爾代夫抵港，待完成隔離後最快下月初歸隊。
傑志總監兼總教練朱志光昨日更證實，此子的特區護照申請已經獲批：「佢上年4月申請，估唔到咁快。謝家強啱啱得咗啦喎，入境處通知咗，隔離出番嚟就攞到。」惟謝家強要以本地球員身份出戰「亞冠盃」，要先獲港隊徵召並出戰一場國際賽方可。
幸好日前亞洲足協宣布「亞冠盃」分組賽延至6或7月進行，因此朱Sir建議港隊可在這段時間約戰如澳門等鄰近地區的代表隊，即使未能成事，在參考過中超一則案例後，相信謝家強、費蘭度等球員仍能以本地球員身份出戰亞洲賽︰「見到內地有個球員攞咗（護照），冇踢過國家隊都畀佢打亞冠，依家Check緊，畀啲資料亞洲足協等佢話得唔得。」
此外，亞洲足協昨日落實世界盃亞洲區外圍賽各小組的主辦地點。香港隊位處的C組由巴林取得主辦權，港隊將於5月31至6月15日期間赴中東出戰餘下3場分組賽賽事，雖然出線機會渺茫，但仍有望爭取2023年「亞洲盃」的出線資格。黃雋謙報道