達施華起孖天水圍飛馬挫標準流浪

昨日港超聯頭場,經歷「保險金」風波後上訴成功的天水圍飛馬,憑達施華下半場梅開二度,以2比0擊敗標準流浪,聯賽兩連勝之餘,亦成功打破對手聯賽不敗之身。

今仗是自上季煞科日東方龍獅對富力R&F一役後,大球場首場港超賽事。甫開賽流浪不斷施以空襲,6分鐘林學曦衝頂被梁興傑撲出,其後林學曦的頭槌攻門又再中楣。飛馬及後展開反撲,惟基斯及山度士攻門無功而還,半場前雙方互無紀錄。易邊後初段戰況膠着,踢至74分鐘飛馬終憑一次反擊打破僵局,謝朗軒左路傳中,達施華尾柱第一時間撞入,86分鐘此子再接應山度士直線單刀射成2比0,飛馬取得聯賽兩連勝。

郭嘉諾:踢好波答謝友會

賽後天水圍飛馬主教練郭嘉諾坦言可以落場比賽,較獲勝更值得開心:「我頭先走去Philip哥(標準流浪總監李輝立)度,多謝佢哋幾間球會,協助我哋同愉園;我覺得對球迷同對手嚟講,我哋踢一場最好嘅波,係對本地球壇最好嘅交代。」球隊上周六才獲足總通知昨日可如期比賽,「嘉諾Sir」形容過去幾日心情起起伏伏:「好耐未試過自己要做心態調整,對我嚟講今季喺飛馬嘅事情都幾多,我好想專心去教波,但有好多唔同嘅因素影響到我,好希望嚟緊可以專注喺球隊。」林卓臻報道