林樂勤開齋富力R＆F挫理文

兩軍今場皆受傷停問題困擾，富力R＆F謝家強停賽，要由羅拔圖頂替位置，而理文沙普夫、亞哥斯達坐波監；余煒廉、列斯奧受傷，今仗要由余沛康和黃俊皓串演中堅。為攞足3分，富力R＆F全力搶攻，基奧雲尼、古拿頻頻起腳，至完半場前，富力林樂勤接應角球，攝贏近柱頂入，取得個人今季第1個士哥，兼為富力領先1比0。

落後的理文換邊後隨即撳掣，換入鄭兆均和梁嘉恆兩名前鋒搏殺，這個調動迅速奏效，54分鐘鄭兆均扭入中間傳送，梁嘉恆二傳予中村祐人撞射，可惜一抽高出。之後理文攻勢浪接浪，惟中村祐人射門被擋，張憙延起腳又抽中網側，結果富力守到完場贏1比0。

理文宣布爭標無望

賽後理文助教曾昭達表示，在部分球員傷停之下，表現已算不俗，尤其串演中堅黃俊皓，指他發揮相當穩健。然而，今場理文輸波後正式宣布爭標無望，「達Sir」認為雖然今季無盃落袋，但球隊上下着重復賽後球員的整體發揮，多於奪標與否。

另邊廂，富力R＆F主教練楊正光稱滿意球隊演出，當被問到倘若今季「四大皆空」，他自己會有何看法，「光Sir」回應道：「冇辦法，有時有啲額外因素，因為未停擺前我哋無論氣勢、狀態、配合都比較強，但一個疫症令到我哋失咗好多之前建立嘅嘢。」他又認為凡事沒有絕對，將會做好「最壞嘅打算，最好嘅準備」，務求在煞科日贏東方龍獅。