士砵亭明日之星香港製造 吳以琛：我勝在大膽！

「加多碗飯吖唔該！」這已是吳以琛在訪談間吃的第4碗飯，但他看似仍未滿足。「球會Set咗目標畀我，8月返到去要增磅到幾重，所以依家我一日食好多嘢。」在士砵亭青年軍跟操2年，「以琛」的歐洲球員身份今年獲批，並正與球會洽談合約，9月開始的新一季青年聯賽，他終能以正式球員身份上陣。

獨闖葡萄牙成長如童話

「以琛」15歲時透過一位葡籍教練推薦，毅然到葡萄牙試腳，當時他將履歷和球賽影片傳送至數間葡萄牙球會，後來有數支球隊邀請他試腳，其中一支便是士砵亭。「嗰陣純粹想博吓，博唔到又冇損失，所以心態就係有乜嘢就Show畀個教練睇。」試腳至第二周，終激發起他的決心：「去到佢哋嘅訓練基地，發覺入面配套非常好，飯堂、宿舍、物理治療、心理輔導......見到咁正，就定下目標要用盡所有辦法留低。」

除恩師劉棟平（右），「以琛」還感謝標準流浪總監李輝立（左）當年的提攜。

放大圖片

「以琛」的足球成長故事可謂童話般神奇，11歲才開始學踢波，後來加入傑志足球學院邊讀邊踢，與一般香港青少年無異。13歲時因實力欠奉被球隊淘汰，其後發奮圖強，中三期間被英華書院提拔上甲組出戰學界，更曾受教於香港傳奇門將盧國華及劉棟平之下。15歲效力標準流浪時，一個勇敢的決定從此扭轉他的命運，由港超舞台，瞬間躍升至歐洲頂級殿堂，整個過程僅歷時半年，問誰也感到難以置信。「我得咗之後返香港都冇同人講，因為覺得講咗都冇人會信。」

吳以琛憶述剛跟操時，能力、經驗均與當地球員差距甚大，雖然他當時身高達1米94，與對手相比也變得平平無奇，唯獨一樣特質吸引到士砵亭門將總監、曾訓練出奧比歷等世界級門將的Miguel Miranda注意。「教練鍾意我大膽，前鋒單刀我可以出禁區剷埋去，同齡球員比較少呢樣嘢。」

上一隊陪練力抗「波費」

2年之間，「以琛」因身份緣故未能為球隊在正式比賽上陣，但他擁有的難忘經歷可能比隊中任何一位同齡球員更多。「有次一隊有半隊人去晒踢歐霸，唔夠龍門練波，就嚟青年軍個場搵龍門，教練就指咗我過去，我嗰時當然興奮！」練習的對象，由同齡球員變成目前效力曼聯的波基斯費南迪斯，和前巴塞隆拿後衞馬菲奧，「以琛」沒有怯場，反而傾盡所能，誓要撲走對方的射門。「以琛」說：「我估我嗰日嘅表現係咁耐以嚟最好！」

「以琛」除了希望達成自己的夢想，還肩負了爸爸的期望。「我爸爸以前都打龍，80年代踢過幾年星島，佢對波Boot仲留咗喺度。」惟吳父後來因傷患提早退役，長存於心底的足球夢，或者就是他全力支持「以琛」投身足球的契機。「爸爸對我嘅足球都好投入，始終我呢個年紀如果喺香港，都就嚟考DSE，普通家庭未必會咁支持，但佢就畀我瞓身去踢波，仲用盡人力物力幫我，我都好感激佢。」

專注球會唔諗港隊住

從前，期望香港球員能在歐洲頂級聯賽上立足，可能只是虛無飄渺的幻想，但現在已經是吳以琛近在咫尺的目標。「我希望2年內可以上到一隊，成為葡超史上首位香港球員，但最終目標一定係踢五大聯賽。」

提起香港隊，「以琛」雀躍地憶述2015年他曾以球迷身份，見證香港在主場對卡塔爾的賽事中，先失3球下奮戰追近至2比3一幕。雖然他認同大部分港隊球員的激情，但自己沒有拋出一句句，僅是為取悅香港球迷而說的甜言蜜語。他認為目前首要是，提升自己再上一個層次，適當的時候便會作出關於代表港隊的決定：「只要我能力足夠喺歐洲立足，就自然會返嚟。」

吳以琛Profile

出生日期：2003年3月16日

位置：守門員

身高：1米97

體重：82公斤

現效力球隊：士砵亭U19

曾效力球隊：傑志足球學院、車路士足球學校（香港）、標準流浪青年軍

圖／文：黃雋謙