陳志康眼中南華最佳11人

唔係球員又唔係教練,「大頭」今次邀請咗現任足總董事之一嘅「阿Cow」陳志康,上嚟《我撐同董事傾吓偈》,親自解答球迷朋友嘅問題。原來「阿Cow」心目中嘅南華「最佳11人」,除咗山度士、歐偉倫、李健和同佢自己之外,仲有……!

Q:香港足球依家四不像,有得救嗎?

阿Cow:一定有得救,你一唔一齊救?認真講,香港足球四不像,每一層都好需要改善。青訓系統應以最合適香港人嘅足球理念,設計一個統一打法,無論教練或球員去到任何一個年齡層,都可以適應嘅踢法,西班牙國家隊同曼城就係最佳例子。聯賽應聘請高質素外援,絕對有效提升本地球員水平,合力提升聯賽價值,令足球產業化,暫時分享住咁多先。

Q:踢南華時邊場波畀你最美好嘅回憶?喺南華同邊個最熟?

阿Cow:銀牌決賽,係我足球生涯首個冠軍。最熟係岑國培,因為我哋係同房。

Q:球員生涯中,你最欣賞邊位球員? 最難纏嘅後衞又係邊個呢?執教生涯中,又有邊幾個係愛將?

阿Cow:最欣賞係山度士,個子唔高,但成就非常高,認真難得!最難纏嘅後衞係丘建威,速度高、力量強,防守快狠準,好難應付。愛將都幾多,唐建文、麥基、鞠盈智、陳柏衡同拉斯錫都係。

Q:做球員嗰陣點解揀13號做球衣號碼?

阿Cow:「上山」嗰陣唔到我揀,靚冧畀啲大哥揀晒,點知「13」之後變咗我嘅幸運號碼。

Q:依家點睇翼鋒同閘嘅定位?仲有冇同太陽飛馬嘅球員聯絡?另外,你覺得陳柏衡(圖左)有冇改變呀?

阿Cow:以前嘅翼鋒主要喺邊線推進,現時嘅翼鋒打法比較全面,打配合、中路切入禁區攻門。本地球員成日有聯絡,外援最常聯絡係拉斯錫。陳柏衡轉型出擊後衞,都發揮得唔錯。

Q:點解當年帶飛馬咁勁,都係同冠軍無緣?覺得有咩原因?

阿Cow:除咗我唔夠勁之外,諗咗幾年都未諗到其他原因。認真答,球員心理質素未夠穩定,大賽經驗不足都係原因。但係球員嘅拚搏精神、專業態度,我都非常欣賞。自己身為教練,火候未夠,亦係原因之一。

Q:覺唔覺得賭香港波合法化係唯一出路?

阿Cow:個人而言, 絕對贊成賭波合法化。

Q:所謂識英雄重英雄,球員生涯對賽過又最欣賞嘅翼鋒係?

阿Cow:

講到自己最欣賞嘅翼鋒,當然係「和哥」李健和啦!

Q:踢左翼有冇咩模仿對象?同邊個射手最有眉來眼去嘅感覺?

阿Cow:馬納當拿同傑斯都算係。歐偉倫同巴古沙都有呢種感覺。

Q:球員生涯最高峰係咪喺南華會度過呢?

阿Cow:一定係!

Q:以球員同教練身份最滿意嘅,分別係邊個球季或盃賽呢?

阿Cow:先講球員身份,最滿意係1995-96年球季,拎到人生第一個冠軍,而且「上山」第一年攞到正選位。教練身份最深刻係太陽飛馬反勝南華5比3嗰場,嗰場波除咗比數夠激,水準亦非常之高。

Q:有咩嗜好?

阿Cow:有時間我會揸吓車,同朋友打吓桌球。

Q:你奪獎無數,暫時邊個獎項含金量最高呢?

阿Cow:球員就係「足總盃」決賽連中三元,贏冠軍兼最佳球員獎;教練就梗係「最佳教練」啦!

Q:U19港隊睇好邊位球員呢?

阿Cow:守門員盧兆崎,喺港超聯表現非常突出,係港隊嘅未來。

Q:足總董事有咩做?

阿Cow:我作為董事,亦兼任財務及策略委員會、技術及競技委員會、女子足球小組、裁判委員會嘅工作,範疇比較闊。另外要定期開會、擬定方案,協助同檢討足球發展、監察及改善不同部門之間嘅運作、青訓系統、內容、訓練質素等。