足總今日就會同港超球會坐低開會，希望可以盡快決定嚟緊嘅「復賽」幾時開、幾時收，同埋新一個球季幾時開始。除此之外，其實仲有好多嘢，各間球會都係等緊足總嘅明確指示，好似幾時可以幫新球員註冊、3項盃賽決賽球員上陣資格，同埋新一季各隊主場點樣分配等等，唔知個會要開幾耐呢？
由於疫情關係，喺本地波決定暫停之後，好多隊一方面同啲外援提前完約，畀佢哋快快趣趣返祖家，一方面應該收到足總話OK，就簽咗啲球員先踢復賽，再順勢踢埋新球季。
好似冠忠南區咁，喺查維斯同迪亞高幾個走咗之後，就簽咗佐佐木周同史提芬彭利拿兩個新援；而理文喺幾名華將離隊之後，亦公布簽咗曾錦濤同中村祐人；愉園喺只有盧斯安奴一個外援留隊嘅情況下，就公布暫時簽咗米基爾同曾至孝。一眾球會，特別係會踢復賽嗰6隊，都想知幾時可以幫啲球員註冊。
不過，亦有消息話足總未必可以喺周二嘅會議，話實畀球會知，因為好似話FIFA出咗指引，復賽前係唔會有註冊期，或者簡單啲講係復賽唔可以用新簽嘅球員。如果係咁都幾大鑊，啲球會簽咗啲新球員，要到新一季先用得，咁呢幾個月嘅人工咪……若果真係咁，同足總當初講嘅完全相反咁滯，唔知受影響嘅球會會唔會向足總索償呢？
好記得好早之前，足總喺董事局會議後公布，3項盃賽決賽中，之前喺同一賽事幫其他球隊踢過嘅都可以上陣。聽講呢個「特例」亦畀FIFA「一巴星埋嚟」，FIFA強調足總有責任去維持賽事嘅誠信同體育精神。
至於新一季主場點分配……傾得掂上面嗰兩單，睇怕都好夜，要再開會再傾喇。有消息再同大家跟進啦！