「香港高普」追求輸得起 郭嘉諾：風車係咁解！

Ｑ：1.你以球員和教練身份，分別最享受的是哪個球季或盃賽？2.最滿意的一個决定。

嘉諾Sir：我啲球員生涯唔長，大部份時間效力港會。反而我喺城市大學期間，以隊長身份為城大重奪失落10年嘅『大專盃』，係我人生最重要嘅一場賽事。因為呢個係全隊人幾年嚟嘅努力換番嚟嘅成果，而且嗰場波我頭槌入咗兩個波，所以好難忘！作為教練，當然『第41屆省港盃』主場贏廣東隊4比0嘅賽事最難忘。我始終認為，喺2012年決定辭去港會嘅工作，全力投身足球圈，係我到依家最滿意嘅一個決定。當然，娶咗我老婆都係一個唔錯嘅決定啦！

Ｑ：1.你個pro牌考成點啊？2. 港超入面你最鍾意邊啲球員？想同邊個合作多啲？3. 你嘅「最佳11人」係邊11人？

嘉諾Sir：Pro牌現在還欠最後一個考試，大約10至14日，自己亦希望盡快可以完成，因為實在拖得太耐。整個港超，當然有好多好好嘅球員，都希望可以同佢地合作。我自己本身喜歡聰明而又肯打肯拚嘅球員，戰術領悟能力高、執行能力高、而且少說話多做事，黎格爾、胡晉銘、羅振庭等球員都係呢一類型。如果可以嘅話，我希望可以做咁多位港超主教練嘅助教，喺佢哋身上學嘢，了解吓佢哋嘅足球理念，點樣可以一齊融合吓去幫助香港足球發展。最佳11人來講，我會揀由幫香港衞冕『第41屆省港盃』嘅球員組成。佢哋成功喺球迷面前證明自己，我期望呢班球員將來可以喺港超贏得『最佳11人』嘅美譽，進一步為佢哋自己肯定，成為足球員係正確嘅選擇。

Ｑ：『嘉諾兄』，現在香港球圈以守為攻嘅大趨勢下，你主張以攻為守，我非常佩服！如果有日帶香港隊，你也會以這樣侵略性嘅戰術對付日韓伊澳嗎？怕不怕有大敗嘅風險？

嘉諾Sir：進攻可以贏一場比賽，但防守可以贏一個冠軍，這是足球教學嘅傳統理念。香港隊近年嘅賽事，面對勁旅只可死守，輸少當贏，缺乏了『搏槌』嘅心態。我希望球員在比賽時可以豁出去，放膽做多點進攻，否則只會出現0比0嘅賽事。這個踢法當然有風險，柬埔寨以14比0大敗予伊朗就係個好例子。簡單來說，我們需要一些輸得起嘅球員、輸得起嘅球迷，以及輸得起嘅教練，才可以令香港足球得到大躍進。

Ｑ：師兄，有無諗過去香港以外嘅地方教波？又或者已經有亞洲球隊搵過你？我覺得外面足球發展更全面，有機會出外吸收經驗都好，教練都應該要外流。

嘉諾Sir：師弟你好！多謝你嘅提問！教練同球員一樣，當然渴望出外嘅機會。香港球圈競爭比較細，而且缺乏政府、商界，甚至本地球迷支持，很難去創一番事業。亞洲足球來講，南至澳洲、西至黎巴嫩，天氣、語言、文化，都有非常大不同，對足球從業員嚟講係比較難適應。但我相信香港作為國際大都會，香港人喺外地適應比較容易，亦希望其他亞洲國家給予多啲機會我哋香港嘅足球從業員。到最後，喺外面所學到，都帶回香港，幫助我哋香港嘅足球事業更進一步發展，銜接世界。

Ｑ：好多問題。點睇「香港高普」呢個綽號？如果有得時光倒流，你會否仍堅持離開足總？作為被稱為公關手腕最強香港教練，是如何啟蒙這些「手腕」？「名宿之後」這個光環利多於弊，還是弊多於利？2019年省港盃謝家榮死頂結果連亞洲U23都冇得踢，當時所有矛頭指向你，你會點睇熱血與足球生命之間相輔與矛盾？

嘉諾Sir：我非常多謝一眾傳媒畀我呢一個稱號，老實講係受之有愧！我雖然係曼聯球迷，但非常喜歡看利物浦的賽事，喜歡看高普的一舉一動，怎樣令利物浦贏波，喜歡他那份「全身投入」嘅教導理念。其實教練有很多種類別，高普嘅方式只是其中一種，沒有好與壞，但我作為球迷，很喜歡這類型嘅教練。我父親（郭錦洪）係足球名宿，係我哋家族嘅榮幸。我好感謝父親為香港球圈付出咗咁多，好高興佢做嘅所有事都得到認同。作為兒子，我好高興可以繼續為香港球圈效力，是否名宿之後其實並不重要，最重要是能夠幫到我哋嘅香港，重返亞洲足球頂尖之位。一隊球隊冇話冇咗邊個唔得，年輕人仲有好多機會表現自己。『家榮』同『子濤』都係99年出生，仲可以參加下屆U23及亞運會，到時又可以爭取出場機會。

Ｑ：嚟緊愈來愈多入籍球員，你有無建議畀年輕球員去加強競爭力？最睇好邊啲年輕球員可以挑戰入籍兵或者球會外援？

嘉諾Sir：嚟緊入籍球員嘅數目，只會有增無減。香港球員喺幾個位置比較弱，包括中堅、單箭頭同左閘；而可以『派牌』嘅球員亦比較少。要平衡香港隊實力，暫時必需要外籍球員輔助。年輕球員要出頭，必需要建立自己嘅一個強項，可以畀人賞識。陳俊樂有全面嘅體能及戰術執行能力、徐宏傑有速度及高紀律性、鄭兆均係難得嘅「雙槍將」，有敢於一對一嘅進攻心態。呢一班年輕球員能夠率先成為大港腳，獲得比其他年輕球員更多嘅機會。其實我哋有好多敢作敢為嘅年輕球員，只係缺乏落場機會。當然，年輕球員自己亦都要爭氣，要令教練覺得應該畀機會，可委以重任。

Ｑ：你嘅招牌風車手勢有乜意思？

嘉諾Sir：其實要多謝球迷，將我喺上季元朗主場對傑志嘅賽事末段，要求所有球員向前搶波嘅動作造成GIF圖，之後喺網上流傳，先至令我有『風車Sir』呢個稱號。其實個動作嘅意思係一齊向前進行壓迫。