曾為「綠戰友」離開難過 杜度留低失變得

「我相信所有事發生都有原因,今季留隊唔只幫到大埔,自己亦學識咗好多嘢。」和富大埔守衞杜度(Dudu)承認,季初的確曾對上季戰友的離去感到難過,但命運有時就是如斯奇妙,當自以為是損失,卻在冥冥之中尋找到得着。

曾同尼馬做過隊友

杜度出生在聖保羅州里貝朗普雷圖市,與一般巴西小孩一樣,自小與足球為伴,其家人亦是老牌球會山度士的球迷。13歲時Dudu考進這家「球王」比利的成名球會,更曾與尼馬做過隊友:「我同尼馬一直效力唔同梯隊,但試過喺場青年聯賽一齊上陣。」礙於陣中高手如雲,Dudu未能躋身一隊,2013年轉投里約球隊雷森迪。更曾在一場對巴甲豪門的比賽中頂入金球:「有場聯賽對法林明高,雷森迪半場落後兩球,下半場追番2比2,最後我頂入埋反勝一球!因為係全國直播,全家睇到我入波,開心到黐線!」

隨後數年,Dudu始終未能躋身巴甲行列,在效力彭拿保蘭斯期間,他遇上前往香港發展的機會:「一位本來可以嚟香港嘅隊友因為受傷冇嚟,反而推薦咗我畀大埔。」2016-17年球季,甫加盟大埔即贏得菁英盃冠軍。去年更為「綠戰士」勇奪港超聯錦標。這些豐碩成果引證,本來看似前景未明之路,竟是邁向成功的康莊大道。

升呢做隊長責任重大

然而風光過後,大埔的冠軍功臣相繼出走,遺下杜度獨力撐起半邊天,惟他的想法未有過分消極:「大埔今年有一個全新班底,留隊可以畀我證明自己係隊中最重要嘅球員。今年大埔有得踢亞洲賽,有機會喺呢個舞台展示實力,留隊係最好嘅抉擇。」

大埔上半季表現無疑較去年失色,季中曾跌入10場不勝的低谷。面對窘境,今年戴起隊長臂章的杜度,除承擔帶領隊友的責任,還肩負球迷的盼望:「我效力咗3年半,同大埔區有好強嘅連繫。我熟悉呢個社區,球迷對球員好熱情,好想為佢哋踢好每一場波。」

獨具慧眼薦伊高來港

杜度下月17日才滿30歲,雖然不算年老,惟他已未雨綢繆,在球員和經理人兩項事業之間雙線發展。「我喺巴西識好多優質球員,希望可以推介佢哋嚟香港踢波。」

事實上,上季榮膺「4料足球先生」的前鋒伊高沙托尼(Igor),便是Dudu首個「代表作」。「我同Igor曾經喺巴西紅牛一齊踢波。前年『堅Sir』(前大埔主帥李志堅)想搵一位9號仔,我話我搵唔到9號,但就識得一位頂級嘅7號!」結果Igor不負眾望,加盟大埔兩季射入29球,上季更協助「綠戰士」贏得港超冠軍,證明Dudu獨具慧眼,他還明言:「我會推薦更多,好似Igor咁厲害嘅球員嚟香港!」

杜度Profile

年齡:29

國籍:巴西

位置:防守中場、中堅

曾效力球會:山度士、雷森迪、巴西紅牛、彭拿保蘭斯(只列部分)

現效力球會:和富大埔

今季上陣/入球:12場/2球

圖:文/黃雋謙