面對新環境多得好兄弟
大家好！新年快樂，首先祝大家身體健康，提提大家記得做好個人衞生，為己為人，出街一定一定要戴口罩，勤洗手呀！
入番正題，剛剛由東方龍獅轉會富力R&F，可能大家會有啲意外，對我而言亦係好大嘅轉變。但經過同東方龍獅會方嘅溝通後，轉投富力R&F相信係我最好嘅選擇，當然我非常唔捨得離開我嘅家庭，所以好多謝太太Elsa嘅支持，亦十分感謝富力R&F嘅賞識。
啱啱嚟到新環境都好緊張，始終好多嘢比較陌生，幸得好兄弟「均宜」，同其他職、球員嘅照顧，總算慢慢習慣到。教練「光哥」（即楊正光）好清楚咁話我知我喺球隊嘅角色，希望我可以盡快同新隊友建立默契；我自己亦會加倍努力爭取正選。之前喺對標準流浪嘅主場賽事上陣咗30分鐘，唔太滿意自己嘅演出，但係我有信心適應晒後，會為隊友製造更多埋門機會。
最後，在此祝願香港一切安好！