傑志孖妹衝呀!

兩個人到底要幾有緣,才可不約而同加入同一隊波,又入讀同一科?今年一同入讀城大媒體及傳播系的兩名傑志女足新球員,曾浩恩(Letti)和李頴欣就證明世上確有如此巧合之事。當然,這對「孖寶」在球場馳騁背後,也同時依靠着家人的支持。

曾浩恩代父從軍變港將

18歲的曾浩恩踢足球資歷較一般球員淺,她訴說3年前才真正接觸這項運動:「其實我本身對足球完全冇興趣,以前曾玩過10年溜冰,又打過乒乓波,冇諗過依家會全情投入足球世界。」在溜冰場度過十載,更曾在國際賽奪獎,到底有甚麼原因驅使Letti移情別戀?她自言全因父親:「我爸爸年輕時有踢過港隊,但之後因為返工放低咗足球。自從聽完佢講呢件事,就想幫佢完成踢足球嘅夢想。」

父親遺傳足球基因

為了「代父從軍」,Letti在15歲那年參加暑期足球訓練計劃,沒料到當初對足球一竅不通的她,竟然充滿踢波天分:「計劃完咗後入選區隊,有次比賽畀Betty(足總女足經理黃若玲)叫咗去港隊試腳,仲成功入選埋。」由學踢波到入港隊之間僅費時數月,Letti可謂天才橫溢,但是她從來不敢自滿,反而比同齡球員更加努力:「我知自己起步比人遲,所以好想追番上其他人嘅進度。中學時會朝早7點返學校喺球場自己練波,周末又會捉爸爸落街加操。」

進步神速除了拜勤力所獻外,還多得父親無條件支持,Letti表示,年初時既要準備中學文憑試,又要兼顧球會操練,忙得不可開交。幸好有父親從旁協助,令她得以在足球與學業上兩者兼顧:「嗰時球會練到好夜,佢每次都會嚟接我,我可以慳番唔少時間溫書同休息,所以都好多謝爸爸。」Letti還透露,現時幾乎每逢落場比賽,爸爸都成為座上客,令她不得不承認爸爸已成為自己的Fans呢!

李頴欣媽咪捧場最難忘

比起3年前才起步的曾浩恩,李頴欣就相對經驗豐富,她自小三起便接觸足球,直至12歲加入流浪接受正規訓練,中學階段更在車路士足球學校展開球員生涯。整個求學階段在球場度過的時光,幾乎比在課室還多,「頴欣」透露曾因此有班主任向其母親投訴:「佢覺得踢波會影響成績,叫阿媽唔好再畀我踢波。」

「頴欣」表示,其實媽媽當初曾對其踢足球的熱誠抱有懷疑:「細個我玩玩具好快就厭,所以初頭佢覺得我都唔會踢好耐,點知踢踢吓就咁多年。」自從看到女兒如此為一件事堅持,媽媽也漸漸開始信服「頴欣」對足球的熱愛,更為她在足球場上取得的成功而動容,她憶述一次媽媽親自到球場觀看她踢波的經歷:「3年前省港盃媽咪第1次嚟睇我踢波,賽後我哋影相見到佢個樣好開心,我會覺得佢為個女而感到自豪!」

望為傑志爭佳績

媽媽的支持,成為李頴欣足球事業的最強後盾,助她得以鼓起勇氣挑戰更高層次。今季傑志女子隊主力流失,曾助舊東家贏得錦標的「頴欣」當然被寄予厚望,她亦希望透過自身經驗幫助球隊:「今季係多咗份責任,但又唔係好大壓力,而秋玲Miss(傑志女子隊主教練張秋玲)都好信任我,希望自己表現可以穩定啲,保持住個狀態,最緊要幫到球隊。」

文:黃雋謙