栽培小將兼顧護級冇衝突 鮑家耀耐性最緊要

愉園今季重返頂級聯賽,會方目標給予本地年輕球員更多機會外,亦致力栽培自家教練,將帥印交予升班功臣之一的鮑家耀。「壓力一定有,因為好想畀到機會後生仔,亦要爭取成功護到級。係有啲難度,不過兩個目標係無衝突嘅,但係一定會有先後次序,要啲時間,急唔嚟。」教練生涯第二次執掌港超球隊的鮑家耀表示。

今季港超揭幕戰,愉園作客旺角場生吞傑志5隻「光蛋」後,儘管被球迷批評「唔夠班」、甚至預測「做硬升降機」;但同時獲得的正評也不少,「好肯畀機會後生仔」、「對住傑志都冇話死守」,以及「啱啱上番嚟要啲時間」等等,對於這支「港超新軍」而言,雖未算得上「輸波贏口碑」,但總算十分真摯的鼓勵。「第一場對住傑志好難要求太多,個別後生仔第一次踢港超,就要對住全港最好嘅翼鋒費蘭度,波係輸咗但對佢哋嚟講係好好嘅學習嘅機會,佢哋未來仲有好多場波要踢,會對到好多出色嘅對手,如果驚呢樣、怯嗰樣,咁就算會方畀幾多機會都冇用。」鮑家耀謂所以當他見到陣中的年輕小將,到第二場作客對標準流浪,表現和戰意都有明顯改善時,乃比全取贏波3分,更加開心。

季初磨練再伺機搶分

既要重用年輕球員,又要成功護到級,記者打趣問是否如「唔使急,最緊要快」般高難度時,自信今次執教愉園,會比之前擔任和富大埔主帥時進步的「鮑Sir」詳道:「我講過啦!兩個目標係冇衝突嘅,不過真係要好睇會方有冇耐性,畀唔畀到足夠時間球員同埋我哋幾個教練。我覺得如果啲年輕球員係得嘅,經過季初嘅磨練,有機會就全力去追分。要兩個目標都達成嘅話,大概應該係咁。」「鮑Sir」坦言,與當年執教和富大埔時相比,自己經過幾年的學習後,在各方面都應該會做得比之前好,唯一沒有改變的,就是依然感到壓力。

感激「老細」給予自由度

與大部分港超球隊比較,愉園季前組軍工作較遲完成,「鮑Sir」笑說雖然辛苦,但非常值得,因為:「依家隊中好多年輕球員,都係好細個已經喺車路士(即車路士足球學校(香港))踢,而我自己喺退役之後,基本上係喺車路士展開教練嘅生涯,加上大家由丙組一路打上嚟,兩個老細(即足主陳志實及董事林燦彬)畀好大自由度我哋,『阿迪』(即總監潘文迪)又好幫手,所以好希望可以一齊完成到個使命!」

為囝囝打乒乓波都掂

「鮑Sir」今季出任愉園主帥,雖然車路士足球學校(香港)安排其「停薪留職」,讓他可以專心現時的工作。但因為同時執掌愉園男、女子隊,論繁忙程度跟當年執教「綠戰士」,實有過之而無不及。「『阿仔』(鮑浚霆)同『阿女』(鮑凱婷)一個12歲、一個8歲,大得好快。所以我一唔使做嘢都會陪佢哋,『阿女』踢波同『阿仔』打乒乓波,我哋都係一家去睇,簡簡單單嘅家庭樂都好開心嘅。」

採訪當日,「鮑家」總動員到太和體育館捧鮑浚霆場,在記者要求下「鮑氏父子」合組雙打,與教練切磋一番。只見「鮑Sir」拉、推板都似模似樣,這位「廿四孝」父親笑說:「我冇話你知咩?我讀小學嗰陣打校隊!哈!哈!(係,40年前吖嘛!)」

鮑家耀Profile

花名:鮑仔、溫拿阿強

曾執教港超球隊:和富大埔

球員年代司職:右後衞

曾效力球隊:花花、駒騰、星島、好易通、晨曦、東方(只列部分)