最佳球員你有份揀！！ 大專籃賽開火教大鍊理大
今屆大規模進化的「JORDAN BRAND INVITATIONAL」大專籃球邀請賽，今日火熱開鑼！賽事最大「賣點」除了球隊要應付密集式賽程外，更首次舉辦「Own The Game」投票活動，大大提高賽事關注度！今屆揭幕日提早上演去屆決賽翻版戲碼，衞冕的理工大學出戰教育大學，當中兩軍的「恩恩怨怨」，定必再度引起籃壇話題！
上屆決賽理大「破百」擊敗教大奪冠，此事讓教大隊長馮嘉豪一直耿耿於懷，要借今次「最後機會」還以顏色：「唔經唔覺，我已經打咗7年教大，暑假之後我就畢業入職教書，所以今次『JBI』係我最後一次着起教大波衫上陣！呢7年經歷咗好多開心事，但亦試過好多次唔開心咁輸畀理大，所以好想趁今次機會帶住一班兄弟手足，喺決賽拎冠軍，咁就係好美滿嘅結局！」
改制打得密馮嘉豪嗌好
談到改制後的賽事，11支大專隊伍分成兩組，先打雙循環賽再進行8強淘汰，馮嘉豪直言有着數：「呢個賽程改革相當好，以往我哋打足一年嘅大專盃，都只需應付7場賽事，真係好少機會畀到我哋發揮。不過，依家呢個比賽淨係小組賽都已經10場，仲要喺一個月內打晒，除咗對一向重視體能鍛煉嘅教大有利外；我嘅『最後暑假』亦因此變成『完全籃球暑假』，相信會好充實兼畢生難忘！」教大擁有馮嘉豪（遊協）、蕭俊傑（南青）及楊仲翹（飛鷹）這三位甲一球員坐鎮，今晚於A組迎戰有關洛賢（南青）及黃偉琪（遊協）壓陣的理大，勢必爆發一場激戰。另外，應屆大專盃亞軍珠海學院亦會登場，與港大爭響頭炮。
賽事為提高觀眾參與度，大會首次舉辦「Own The Game」投票活動，新增網上投票參與選出各個獎項，球迷則可由明日晚上6時後，於網上投選他們心目中的最佳球員。每人所投下的每一票都會影響JORDAN BRAND INVITATIONAL最佳陣容，投票次數愈多，UNLOCK的驚喜亦愈多。即使處於場外，每個人都可以「Own The Game」，以票數影響戰局！投票LINK：http://digital.nike.com.hk/JordanBrandInvitational2019。
今日賽程
地點：理工大學BLOCK X
5:30pm 職訓局 Vs 中 大
7:00pm 港 大 Vs 珠 海
8:30pm 教 大 Vs 理 大
司徒子文報道