開靚紅酒換取情報
卡爾球員時代係普波域治嘅得意弟子，近日網上瘋傳一張相片，兩師徒喺三藩市一間餐廳撐枱腳，據講兩人傾咗近兩粒鐘，仲開咗幾支紅酒，有網民話「波波」普波域治雖然着住平價Ｔ恤，不過所飲嘅紅酒價值成5,000美金，絕對唔係一般飯局咁單。
消息指呢餐飯係發生喺速龍躋身總決賽前24小時，網民估計卡爾係想請教定恩師點去對付李安納。要知道李安納自2011年展開NBA生涯後，一直都係效力馬刺，直到今季先轉投速龍，仲「一擊即中」帶領呢支多倫多球隊歷史性殺入總決賽。李安納有幾多斤両，普波域治自然最清楚，勇士教頭卡爾梗係唔會放過大好機會，向恩師普波域治攞料啦！