傑志冠忠南區搶尾胡!

本屆足總盃決賽今午4時於香港大球場爆發王者戰,由傑志火併冠忠南區。作為今個球季最後一項重要錦標,雙方賽前均揚言絕不留手,期望能「食出尾胡」,捧走獎盃及來季亞洲賽資格,為2018至2019球季畫上圓滿的句號。

朱志光:唔會諗過去威水史

力爭衞冕的傑志在晉級路上先後擊敗理文、夢想FC,縱然球隊仍要兼顧亞協盃分組賽,但主教練朱志光強調不作保留:「傑志嚟到呢刻雖然大約仲有1個月比賽,但始終係決賽,我諗球員都唔會保留。盧卡斯啱啱好番,如果醫生准許嘅話我都會畀佢上陣,希望臨場發揮做到我哋嘅要求,南區今季防守好穩健,我哋點樣撕破佢哋嘅防線,好講球員臨場發揮。」

過去兩屆傑志均能稱霸足總盃,「朱Sir」謂:「壓力嘅話,有啲球員有、有啲球員冇,雖然過去兩屆傑志攞咗7個冠軍,但呢刻唔會諗過咗去嘅嘢,希望打好比賽先。」據悉球隊中場中村祐人、泰迪肯定缺陣,而門將王振鵬因上場領紅需停賽。

貝可泓:攞埋冠軍就最理想

聯賽季軍冠忠南區先後淘汰富力R&F及佳聯元朗,來到今午決賽,助教貝可泓表示:「我哋戰意好強,慶幸冇任何傷兵同停賽,前一日球會副主席(黃焯添)都有特登同我哋打氣。無論教練團、會長、主席都好強調一點,就係無論結果係點,冠忠南區已經有一個好好嘅球季,當然有埋冠軍就更理想!傑志係過去10年最成功、捧盃最多嘅球隊,所以壓力可能喺對方身上,希望我哋做到啦!」

南區今次是繼2015至2016球季高級組銀牌後,再次躋身盃賽決賽,「Calvin Sir」認為:「嚟到決賽,犯錯少嘅球隊會有利,所以我哋都同球員講,開賽頭15分鐘都要小心啲,唔好因為一啲低級、致命嘅犯錯導致我哋處於劣勢。」

大埔超級城都有Live睇

到底是傑志成功「冧莊」足總盃?或是冠忠南區奪得球會首個頂級賽事冠軍?想知道最後答案的球迷,今午可親身入場或者收看直播就會知曉。

今場足總盃王者之戰,大家除了可以透過on.cc東網,及香港超級聯賽Hong Kong Premier League同「我撐本地波」兩個Facebook專頁收看直播外,更可以去到大埔超級城,透過商場內的大電視,與其他球迷一齊見證今屆足總盃王者誰屬。

圖/文:何彥霆、陳焌鏗