同係投資講求耐性 夢想FC憶Sir：足球=紅酒

擁有亞洲足協體能教練牌照的賴沛憶，絕對是現代足球中不可多得的人才。雖然體能訓練才是他的專業，但他深明培育青年球員的道理：「佢哋最需要比賽經驗，而且所需時間比年長球員長，唔會短短1、2個月就建立到。」

租酒窖儲500幾支珍藏

「憶Sir」平常除了體能指導以外，鑽研紅酒亦是他的嗜好。這位「品酒專家」收藏紅酒的狂熱程度，並非僅僅在家中存放數瓶所能形容，他甚至特意租用了一個酒窖來儲存他的珍藏。「依家儲咗500幾支，高峰時期接近1,000支。」他淡然的說。藏酒已達10年的「憶Sir」，用時間來引證紅酒和足球的相似之處：「收藏紅酒需要耐性，至少要等三五七年，培育年輕球員亦一樣。」

記者有幸到訪這位紅酒收藏家的寶庫，於是一探這批瑰寶之中，哪一瓶才是最價值連城，「憶Sir」從數個木箱下拿出了他的寶物：「呢支當年幾百蚊買入，而家已經可以賣到6、7千蚊，我當係一種投資。」他將投資美酒的要訣活用在足球場上：「葡萄酒買番嚟初初係唔飲得，需要時間等佢成熟，喺市場上先會高價；年輕球員17、8歲踢職業自然冇咩表現，但等多幾年儲多啲比賽經驗，表現就會好啲，打得好價格自然提升，球隊成績亦會愈嚟愈好。」

「小將成熟自有收成」

「憶Sir」讚賞夢想FC能夠運用這套原則來營運，這亦是他當初加入教練團的原因：「行政總裁梁智駒先生，每季簽咁多後生仔返嚟就係一種投資，佢哋可能要3至5年後先會成才，但當佢哋成才，就係我哋球隊收成時。」

夢想FC周五（10日）將在「足總盃」4強鬥傑志。「憶Sir」形容，假若有幸晉級繼而奪冠，這座獎盃的成果，便有如紅酒投資的收成：「呢兩季我哋投放好多時間同資源落呢班後生仔，希望憑住我哋成隊嘅努力贏到冠軍，就等於葡萄酒賣到一個好價錢咁。」

「尖隊」球員出名「百厭」，「憶Sir」當然也逃不過被「整蠱」。「有一次訓練落大雨，成個球場都係積水。熱身嗰時我畀拿祖推一推，成個人撻落地，跟住成身濕晒，啲球員就猛咁笑。」不過他澄清，若能促進隊內士氣，被捉弄也無傷大雅，還笑說：「要玩嘅我一定同你玩到底！」

年輕球員追求活得開心，飲食上相對放任。「憶Sir」作為體能教練，時常對球員的生活習慣作出提點：「壞習慣容易影響狀態，食煙飲酒呢啲固然唔得，要飲多啲水，食少啲垃圾食物，都有助恢復同提升體能。」

最後，「憶Sir」借專訪寄語一眾年輕球員：「人生走向成功的第一步，就要有遠大的夢想。實現過程中難免會遇到阻攔，但人會遇強愈強，就像體能訓練時設置的障礙物一樣，只要努力不懈，永不放棄，必能達標。記住：『有夢想，可成真！』」

圖/文：骰仔