李安納打到Kobe咁款 速龍作客咬76人
速龍王牌球星李安納打出超級球星風範！呢位小前鋒喺周一嘅NBA季後賽東岸4強大戰，獨取39分加上14個籃板，包括最後1分鐘射入高難度三分波，帶領速龍作客以101比96擊敗76人，7場4勝制賽事追成2比2平手，睇嚟呢Round有排鬥。
季後賽講求經驗，速龍新星施亞卡姆常規賽雖然表現搶鏡，但嚟到季後賽，發揮難免走樣，第1節比賽佢連環起手射失，冇晒信心今場只得9分。反觀效力馬刺時已獲冠軍指環嘅李安納，季後賽打出球星風範，今場孭起大部分速龍進攻轟入39分，單季第6次季後賽得分達「30+」，創下速龍紀錄。而連續4場季後賽「30+」得分，亦係速龍隊史最佳成績。賽後76人教練布朗都忍唔住大讚：「李安納自己創造射球機會嘅能力，完全係高比拜仁嘅級數！」
主隊76人雖有占美畢拿攻入29分加上11個籃板，可惜大前鋒艾賓特上仗鋒芒過露，今仗即被速龍盯實，是役只得11分成為球隊致命傷，Game5將會回歸多倫多進行。