施亞卡姆發威速龍反咬魔術
NBA季後賽昨繼續惡戰連場，其中東岸首圈Game3有速龍作客以98比93力克魔術，連贏兩場將總場數改寫成2比1，帶領速龍今場贏波嘅並非帶病上陣嘅主將李安納，而係今季表現進步神速嘅大前鋒施亞卡姆。今場呢位25歲球員交出30分、11個籃板及4次助攻嘅全面數據，難怪賽後一眾速龍成員都大讚佢係今季「最佳進步球員」大獎嘅最佳人選。
嚟到季後賽愈打愈好嘅施亞卡姆，之前兩場季後賽分別交出24分、9個籃板及19分、10個籃板，已經超越隊友「泡泡龍」路維，成為陣內繼李安納之後最可靠球員。今場李安納帶病作戰，只交出16分及10個籃板，射手丹尼格連攻入13分，路維則有12分及10個籃板，但講到貢獻最多，始終都係施亞卡姆。
路維喺賽後興奮咁話：「施亞卡姆表現難以置信，佢一定係今年NBA最佳進步球員，佢只會愈打愈好！」
韋少翻生雷霆追番場
魔術今場以泰倫斯羅斯取得24分算係最好表現，可惜全隊錄得16次失誤，成為輸波關鍵。同日賽事，塞爾特人喺主將艾榮指揮下，作客以104比96擊敗溜馬，將總場數改寫成3比0，晉級在望。至於雷霆則有韋斯布克「翻生」，攻入33分及11個籃板，主場贏拓荒者120比108，將總場數追至1比2，保住晉級希望。