何力行誓證拔萃勁揪
「勁揪」精神是甚麼？不放棄？一夫當關？就讀拔萃男書院附屬小學的何力行答到你！今年最後一次代表母校參加「NIKE香港五人足球賽」的「何力」，四年級那年參賽只能充當後備，翌年輸得失球差分組賽飲恨出局，到今屆擔起隊長一職，「何力」誓言帶領師弟奪回失去的「NIKE 5」NIKE Academy冠軍，告訴大家甚麼是「拔萃勁揪」！
（on.cc東網周日下午1時直播）
「NIKE 5」其中一個重點組別「NIKE Academy」，將於今早上演4強，由拔萃的「DBSPD」迎戰番禺會所華仁小學，力爭入下午的終極決賽。「第一年參賽我係成隊年紀最細，只能喺比賽尾段入替隊友，都有啲失望。第二年我做咗主力，都希望可以攞冠軍，但最終分組賽輸得失球差出局。」力行失落地訴說之前兩年參賽的經歷，但他今年矢志奪冠：「今年係我最後一年，球隊入咗4強，希望可以以隊長身份帶領球隊，幫拔萃贏番個冠軍。」
問到他能為球隊帶來甚麼正面影響，他明言會以身作則，無時無刻鼓勵隊友：「希望今年球隊唔好大意，我會控住個波，睇準機會先進攻，會多啲出聲提場。就算失波都唔會怪責隊友，反而鼓勵佢地唔好放棄，自己更會跑多兩步，『lead住』隊友反擊。」
學偶像尼馬扭波
自小學一年班就是足球隊成員的「何力」，在訪問期間不忘答謝學校的支持：「拔萃嘅設施好好，教練亦好熱心，鼓勵我哋做控傳，就算輸都唔會鬧，最緊要我哋肯去嘗試。」
言談間力行透露他的足球學習對象是巴西球星尼馬，更指出他們兩人之間的相似之處：「我係一個有自信嘅人，即使對手幾強我都唔會驚。而且我鍾意睇尼馬嘅技術，自己都會學佢扭波。」既充滿信心、又有隊長風範、又懂得感恩，拔萃有你呢個咁勁揪嘅隊長，實掂啦！
「NIKE 5」今日下午1時開始於旺角麥花臣硬地足球場，連環上演的10個組別總決賽，每場都會有東網、以及「睇體 ontv Sports」、「NIKE Hong Kong」facebook專頁作網上直播，如想一睹這班未來之星風采，記得留意了！
圖、文：黃雋謙