尋日NBA常規賽，聯盟「2哥」速龍作客以101比126輸畀騎士，近5場第3次落敗。速龍中鋒伊巴卡今場極為火爆，第3節尾段更同騎士大前鋒基斯開拖，結果齊齊被趕出場，勢必面臨停賽處分。伊巴卡對上兩季都試過同對手打交搞到停賽，可以話係NBA拳霸！
速龍主將李安納射入25分，但主隊後衞薩斯頓仲叻，交出全場最高嘅28分。至於今仗「主角」伊巴卡同基斯喺第3節尾段嚟料，兩人爭位時伊巴卡突然跌低，基斯鬧佢插水後轉身走人，點知伊巴卡彈起身衝前使出「叉頸」，跟住就互相出拳，球證自然即時趕佢哋出場。查實伊巴卡性格一向火爆，上季就曾拳打占士莊臣被罰停賽，前季亦試過打洛賓盧比斯而坐波監，可以話係慣犯一名。