三分賽魯域斯基撼咖喱兄弟
「NBA明星周末」傳統焦點三分賽、入樽賽及技巧賽。香港時間周日早上9時開騷，「德國槍」魯域斯基嘅球迷一定唔可以錯過，事關呢位老將大有可能最後一次出戰三分賽，挑戰當今最強三分射手史堤芬居里及其弟施夫居里組成的「咖喱兄弟」，爭取再度登基！
今屆明星賽於「咖喱兄弟」家鄉夏洛特舉行，史堤芬居里明言買咗好多門票，送畀親友入場打氣，所以一定要「射到着火」。不過今季去到邊個球場比賽，都獲球迷掌聲致敬嘅魯域斯基，相信更加搶鏡，呢位06年明星賽三分王能否於職業生涯尾聲再威番鋪？除咗要問過「咖喱兄弟」，仲要擊敗上屆冠軍來自鳳凰城嘅布克、拓荒者球星列拿特等9位對手先有機會，眾多射手雲集肯定有一番激鬥。
韋斯布克向大帝挑機
而明星賽前最後一日常規賽，韋斯布克雖然將NBA嘅連續3雙紀錄增加到11場，而且累積攻入18,247分，超越名宿「手套」佩頓嘅18,207分，成為雷霆加超音速兩個時代嘅隊史得分王，可惜雷霆作客仍以122比131不敵塘鵝。不過交出44分、14個籃板及11次助攻的韋斯布克依然招積，上電視節目為明星賽造勢時，公開向大帝挑機：「占士係我好朋友，但我話畀你聽，佢贏我唔到！」