40+大戰夏登輸畀PG
尋日NBA上演兩位「40+」球星對決，火箭主場以112比117輸畀雷霆。火箭占士夏登拎到42分，不過雷霆嘅保羅佐治（PG）都有45分進帳，加上隊友韋斯布克追平聯盟歷史紀錄嘅連續9場「3雙」，雷霆喺最多落後26分劣勢下完成逆轉。
夏登頭一節因左肩受傷被調離場，第2節回歸後全場獲42分，但其實佢喺第3節開始要紮繃帶上陣，搞到表現稍為跌Watt，就算個人連續29場得分「30+」，都救唔番火箭。
雷霆能夠贏波全賴孖寶「爆Seed」，保羅佐治交出45分同11個籃板，隊友韋斯布克仲醒，連續9場錄得「3雙」（21分、12籃板、11助攻），追平張伯倫保持嘅聯盟紀錄，協助雷霆3連勝。
同日塞爾特人喺主場以112比123不敵快艇，關鍵係艾榮取得14分、1個籃板同2次助攻後，喺完半場前右膝扭傷離場，連累「綠軍」兩連敗。另有消息話艾榮同塘鵝嘅安東尼戴維斯好老友，假如塞爾特人簽到對方，艾榮就願意續約。