夢幻陣容有可能 艾榮放風想去湖人

湖人昨晨喺NBA常規賽主場以105比121不敵76人,雖然勒邦占士仍未能傷愈復出拯救球隊,不過美國傳媒透露,另一明星後衞艾榮向「大帝」認衰後,可能轉會湖人,並肩再爭總冠軍,仲有網民大玩預測,將2020年湖人嘅潛在夢幻陣容曝光!

自上個月腹股溝拉傷後,「大帝」勒邦占士首次參與開波前嘅熱身,但最終都係冇上陣,加上湖人正受球員變動消息影響,有指球會正考慮用幾位新星包括波爾、古斯馬、蘇巴斯同選秀權,交換塘鵝球星安東尼戴維斯,因此軍心難免不穩。結果作客嘅76人憑大前鋒艾賓特交出28分、11個籃板及6次助攻,協助76人輕鬆贏波。

除咗「一眉」安東尼戴維斯主動提出交易申請,「大帝」喺騎士嘅前隊友艾榮亦傳出同塞爾特人隊友鬧不和,引發艾榮早前公開向占士道歉,承認兩年前唔應該反面離開騎士。知情人士指出,現時艾榮明白「領袖唔易做」,的確有計劃再同「大帝」聯手打天下。

想擸埋K湯李安納

當然湖人想再新打造「紫金王朝」亦要繼續增兵,據講勇士嘅奇利湯臣同速龍嘅李安納都成為羅致目標,究竟能否一口氣簽晒4個全明星球員?相信球迷都好期待呢個夢幻般嘅「打機式陣容」成真。

同日,火箭喺主場以116比121不敵塘鵝,「大鬍子」夏登取得37分、11個籃板同6次助攻,個人連續24場得分「30+」,可惜基斯保羅狀態未回復僅得10分、4個籃板同9次助攻,導致火箭一度領先15分的優勢下,仍被有安東尼戴維斯養傷缺陣嘅塘鵝翻盤成功。