AD攤牌想去湖人跟大帝

安東尼戴維斯今季平均每場有29.3分、13.3個籃板、4.4次助攻、1.7次搶截同2.6個封阻嘅超級數據，雖然佢比較易傷，但依然係聯盟中嘅最Hot搶手貨，上月占士就不惜冒住被罰款嘅危險，涉嫌違規公開招攬對方。據報「AD」3日前已同塘鵝攤牌講明唔續約，並且提出轉會申請，由於其經理人同占士一樣係列治保羅，美國傳媒話「AD」呢個時候要求交易，明顯想去洛杉磯同「大帝」拍檔，睇吓可唔可以衝擊總冠軍，仲講到湖人打算用波爾、古斯馬、蘇巴斯同選秀權做交易籌碼。

居里創紀錄勇士11連勝

至於尋日賽事，勇士作客以132比100大炒溜馬，史堤芬居里取得26分、6個籃板同3次助攻，包括連續射入6個三分球，連續7季至少射入200個三分球，創出聯盟新紀錄，加上古辛斯有22分、6個籃板同4次助攻，勇士喺積蒙格連休息下，依然達成11連勝。