19歲仔三分波破百 當錫追平高比紀錄

明星賽得票多過咖喱仔

當錫喺第1節已經孭起進攻責任，令到獨行俠冇被拋開分數，可惜班尼斯喺完場前運球失誤，導致佢嘅努力白費，最後史堤芬居里有48分、6個籃板同5次助攻，射入11個三分球創出個人賽季得分新高，加上杜蘭特有28分、7個籃板同5次助攻，協助勇士4連勝。

只不過，當錫表現唔蝕底，佢有26分、6個籃板同5次助攻，成為2010年嘅史堤芬居里後，首個連續4場得分25+新秀，而且佢嘅三分波10投5中，職業生涯累積103粒三分球，追平高比拜仁同布克嘅紀錄，躋身第3位三分球「破百」嘅未滿20歲嘅球員，未來大把世界。

同日，火箭作客以109比116不敵魔術，占士夏登有38分、9個籃板同12次助攻，個人連續16場得分30+，但由於全隊最後14次3分出手全炒，結果火箭喺最多領先12分下被逆轉。另一方面，艾朗哥頓有22分、8個籃板同5次助攻，帶領魔術連贏2場。