勒邦認GOAT遭圍插

冇咗勒邦占士湖人果然唔掂，周四喺NBA常規賽主場以100比107不敵雷霆，不過「大帝」日前自認係聯盟史上最佳嘅言論繼續飽受網民圍攻，有人話「波神」米高佐敦都唔夠膽自認係GOAT（Greatest Of All Time），幾時輪到勒邦占士！
擔正嘅波爾（右）冇貨賣，湖人唔輸都難。（法新社圖片）
擔正嘅波爾（右）冇貨賣，湖人唔輸都難。（法新社圖片）

勒邦占士因傷缺陣加上隊友古斯馬喺第2節傷出，近排當弗嘅波爾又僅得3分，湖人最終不敵有保羅佐治攻入37分，加上韋斯布克攞14分、16個籃板同10次助攻「三雙」數據嘅雷霆，實在可以理解。只不過勒邦占士近日受訪時自爆，兩年前為騎士贏總冠軍，已經覺得自己係史上最佳，就真係令人費解。

反觀米高佐敦之前講過，根本唔想要球迷給予GOAT呢個稱號：「因為我覺得咁唔尊重張伯倫同謝利韋斯，所有比我更早加入聯盟嘅前輩，我冇機會同佢哋正面對抗，所以我永遠唔會話自己係GOAT。」呢啲咪有卡士囉！