郭嘉諾：初生之犢先唔畏虎
將於明年1月6日及9日出戰「第41屆省港盃」的香港隊，昨日假將軍澳足球訓練中心進行首課操練。港隊早前公布的27人名單，除了中村祐人、袁振昇及梁諾恆外，其餘均為參加明年3月的U23亞錦賽外圍賽之適齡球員，主教練郭嘉諾揚言初生之犢不畏虎，希望小將能表現出不怕任何球隊的心態。
雖然部分球員要備戰今周的港超聯賽或菁英盃賽事缺操，安永佳身在美國尚未返港，不過港隊首課操練仍有23名球員出席。原定領軍的新任菁英發展教練Michael Boris日前辭職，因此港隊改由助教郭嘉諾領軍，不過他就希望球迷將焦點放在球員身上︰「我唔肯定佢因咩事辭職，之前韋特另謀高就，係因為喺港隊有成績先有外國球會搵佢，所以我都唔覺得件事太過負面。我希望香港球迷唔好只關注有教練離職，可以關注番呢班一直練得好辛苦嘅香港青少年球員。」
備戰U23亞錦賽外圍賽
對於今屆人腳較往年年輕，「郭Sir」解釋︰「我相信41年以來，今年嘅陣容係最年輕嘅一班，今次嘅班底係準備U23亞錦賽喺蒙古舉行嘅外圍賽，會同蒙古、新加坡同北韓同組，我哋都睇到1至3月有菁英盃賽事舉行，亦都冇空間去集訓或者長期訓練，所以今次省港盃可以話係唯一亦都係最好嘅備戰機會。」
儘管對手實力及經驗均在港隊小將之上，但「郭Sir」期望球員能夠克服恐懼和壓力︰「我唔想散播負面訊息，例如話作客時就輸少當贏，或者0比0返到嚟就最好，呢個唔係青少年應有嘅心態。初生之犢不畏虎，佢哋未對過中超、中甲球員，反而乜都唔怕，今次作客，我想佢哋表現出對住乜嘢球隊都唔怕嘅心態，喺攻守都要進取啲。」
香港隊將於明年1月2日跟冠忠南區進行友賽，隨後公布決選陣容，主教練郭嘉諾透露，希望將決選名單人數，由去年的21人增至23人。
圖/文：何彥霆