和富大埔富力R&F 4強鍊盡

本地高級組銀牌賽聖誕日續演4強大戰,上月初於港超聯交過手的和富大埔與富力R&F,今日下午4時假旺角場再度交鋒。究竟大埔能否以勝利為2018年寫下完美句號,還是由富力一雪在聯賽落敗之恥?各位球迷除可入場睇好波外,亦可透過on.cc東網直播欣賞今場激戰。(on.cc東網周二下午4時直播)

和富大埔最近2仗,分別於聯賽及菁英盃以2比1的比數擊敗理文及東方龍獅,其中上仗更作出輪換安排楊賜麟及基藍馬等較少上陣的球員出任正選。主教練李志堅表示,該2場勝仗對球隊下半季同時應付亞協盃戰線打下基礎︰「聯賽對理文場波賽果好重要,亦感覺到球隊係控制到戰局,至於上場菁英盃,反而樂見比較少落場嘅基藍馬踢足全場,雖然未算踢得好好,但發揮到作用。」

大埔堅Sir直言 生死戰「惡踢」

問到今仗形勢,「堅Sir」直言「惡踢」︰「大埔優勢在於對富力大部分人腳都好熟悉,又曾在聯賽擊敗對手,所以心理上會佔優。雖然富力之前喺主場賽和南區,對佢哋或者會有啲打擊,不過以佢哋嘅板櫈深度,影響相信只屬輕微,始終今場係一場定生死過嘅4強戰,雙方都會用盡方法去贏,肯定好難打。」

富力R&F自月初遭冠忠南區逼和後,上周菁英盃正值「輪空」,令球隊有近20日休戰期,主帥楊正光透露,這段時間正好讓傷兵爭取時間康復,其中沙沙康復進展良好,而羅拔圖近日更可以隨隊練波。提到富力R&F曾在港超敗於大埔腳下,「光Sir」則警誡球員屆時要保持集中:「之前喺聯賽對大埔雖然係輸波,但我哋係主導嗰場比賽,控球時間亦多啲,只不過有啲個人犯錯先導致失波,希望今場唔會再有呢啲情況出現。」

楊正光下工夫 改善攻轉守漏洞

「光Sir」還指出,富力會在由攻轉守方面下苦工,以針對大埔的踢法︰「大埔嘅反擊、行軍速度同傳球質素都比較好,所以喺呢段時間我哋加強咗防守練習,而伊高沙托尼會係我哋嚴防嘅對象。」

旺角場今設Green Store

為慶祝聖誕及新年佳節,和富大埔今午2時30分起旺角大球場設置售賣球會紀念品的「Green Store」攤位,現場除會有扭蛋機遊戲抽出球員鎖匙扣,以及有售大小尺碼的「Green Bag百寶袋」外,同時亦會免費派發2019年曆卡,有興趣的球迷記住提早來到球場「入貨」﹗