夏登發威叫反對者收口

基斯保羅前一仗對熱火時拉傷左腿肌，至少要養傷兩個星期，昨仗夏登喺首節就孭起進攻責任攻入12分，第2節佢嘅得分同助攻包辦火箭得到嘅全部13分，成功撻着埋隊友，全隊喺第3節瘋狂射入9個三分球，最終夏登獲39分、4個籃板同10次助攻，帶領火箭贏波反彈，亦令馬刺3連勝走勢告終。

上季夏登當選常規賽MVP，不過有球迷覺得佢經常扮嘢博犯規，加上佢面對爵士時使出走步遠射球證又睇漏眼，所以對佢好反感，拍片笑佢扮嘢同「無限走步」。今次夏登打沉馬刺可以話出番啖氣，特別對方主將迪羅辛有28分、7個籃板同8次助攻，表現都唔曳。

勇士4分險擒獨行俠

同日勇士喺主場以120比116險勝獨行俠，史堤芬居里交出22分，不過17次起手只係中6個三分球，唔算突出，好在隊友杜蘭特貢獻29分、12個籃板同8次助攻，包括關鍵時刻招牌急停射入三分球，令勇士唔使喺主場失威，至於獨行俠就錄得5連敗。