韋斯布克「四雙」勁肉酸

雷霆昨晨喺NBA作客以112比114不敵公牛，錯過升上西岸榜首嘅機會，而且韋斯布克創造「歷史」，個人職業生涯第4次「四雙」——即係除得分、籃板、助攻外，連失誤都達到雙位數字。

經過大部分時間處於落後，雷霆喺比賽尾段試過反超前，可惜保羅佐治完場前嘅絕殺三分波唔入，最後佢得19分、5個籃板同7次助攻，導致雷霆4連勝結束，而且韋斯布克有24分、17個籃板同13次助攻嘅背後，仲有10次失誤，個人第4次「四雙」。

今次係韋斯布克第109次三雙，有機會連續3季完成「場均三雙」嘅全能紀錄，不過佢不停刷新數據嘅同時，其實有時會失控盲目單打，一旦手風唔順就會造成失誤，好似今場波咁，為咗砌靚數據，搞到職業生涯第4次「四雙」，穩坐聯盟史上呢項羞家紀錄嘅「冧巴溫」，唔知好嬲定好笑。

另一方面，經歷內訌風波後，衞冕勇士重拾王者本色，多得史堤芬居里有20分、4個籃板同8次助攻，包括射入4個三分球，作客以105比95掃低公鹿，近3戰全勝。