謝德謙有得釣魚係福氣！
人愈大，擔任的角色便愈來愈多，冠忠南區門將謝德謙在過去2年，先後多了「足球評述員」和「天愛爸爸」兩個角色，令本來已百足咁多爪的他，更加周身唔得閒。但無論怎忙，「阿謙」都會抽空化身釣魚郎︰「釣到魚可以加餸，就算釣唔到，有一、兩個鐘畀我完全放鬆，做自己鍾意做嘅嘢，都係一種福氣。」嫌記者問長問短，打擾其釣魚雅興的謝德謙謂。
為愛女放棄「命根」
認識謝德謙的朋友都知道，這位先後效力公民、太陽飛馬和冠忠南區的門將十分多嗜好，例如收集玩具車、駕四驅車、飼養冷門寵物、航拍、打籃球、釣魚……（版位所限，未能盡錄）。惟隨着工作繁忙，加上寶貝女「天愛」一天一天長大，許多嗜好都只能回味，他說：「因為想畀『天愛』多啲空間，焗住要將屋企幾個擺滿晒我啲玩具嘅櫃清走，包括等同『命根』嘅玩具車仔，我都會含淚送畀朋友或者放上網賣晒佢。」一字一淚，相信「阿謙」道出了不少剛為人父者的心聲。
除了「天愛」的出現，足球評述員的工作，亦令「阿謙」要與不少嗜好「斬纜」，因為：「首先我要重申，我啲時間分配得好好，足球員同評述員工作係無任何衝突，亦唔會互相影響到，好似第日有比賽，之前兩晚一定唔會去講波，編排上一切都會以足球員身分行先，因為呢一刻踢波先係我嘅正職。而正因為打緊兩份工，要有足夠時間休息之餘，亦要陪老婆同個女，所以之前會同朋友去玩車、打籃球呢啲都冇晒咁滯。」
另類叉電食白果都開心
不過，可能自細受到「謙媽」的薰陶，「阿謙」無論怎忙都會為安排時間給自己享受釣魚樂。「細個我跟阿媽去釣，大個阿媽跟我去釣，拍緊拖、結咗婚同Manie去釣，希望『天愛』大啲都鍾意跟我去釣啦！我真係好鍾意釣魚，有收穫當然開心，就算食白果，但嗰過程都可以令我放鬆，有時有腳一齊去釣，吹吓水，都係開心嘅，可以話係我嘅另類叉電方式。」採訪當日，「阿謙」就找來剛回復單身的陳文輝擔當魚腳，全程邊講邊釣，笑聲不絕。
「最緊要係啲魚具我可以放喺車尾行李箱，唔會好似啲玩具咁佔到屋企空間，而且Manie本身都鍾意釣魚，所以都好支持我。好似嚟緊我哋一家3口會去沖繩旅行，佢都畀我參加當地嘅5小時釣魚團，自己就同阿女去行街，係唔係好葡萄我呢？」還說很喜歡釣魚，近兩句鐘魚毛也沒一條，「鍾意釣啫，無話一定釣得叻o架！」是日「魚腳」陳文輝「抽水」道。
圖/文：戴陶蔚
（部分圖片由受訪者提供）