勇士中鋒一出一入
近期NBA惡耗頻傳嘅金州勇士，日前宣布正選中鋒達美安鍾斯左胸肌撕裂，將要進行手術治療，今季極大機會提早收咧！不過佢哋同一時間傳來好消息，季前來投後一直養傷嘅明星中鋒古辛斯，據報已經可以進行5對5嘅訓練，距離首披勇士球衣出賽之日非常接近，為勇士尋日常規賽擊敗鷹隊帶來「最佳賀禮」。
勇士教練卡爾表示，達美安鍾斯做手術後嘅養傷期將以「數個月」計，今季極可能唔會再落場。呢位年輕中鋒今季大部分時間出任球隊正選，雖然場均上陣時間只得17.1分鐘，但對於內線人手短缺嘅勇士嚟講，達美安鍾斯受傷絕對係重大打擊。好在星級戰將古辛斯正逐步加強訓練力度，卡爾表示佢即將全面投入操練，復出指日可待。
3巨頭發威大炒鷹隊
喺達美安鍾斯及積蒙格連受傷缺陣下，勇士尋日常規賽變陣作客鷹隊，老將伊古達拿被推上正選，喺「3巨頭」杜蘭特（28分）、史堤芬居里（30分）及奇利湯臣（27分）精彩演出下，勇士輕描淡寫大炒鷹隊128比111。