凱景升呢背後嘅男人
自凱景決定升班參戰港超聯的消息傳出後，「第8都升得班？」、「降班膽」、「港甲都踢唔掂」等負面聲音不絕。但球季進行了3分1後，雖然負面批評仍在，卻漸漸出現「鬥理文值得攞1分」、「對傑志上半場守得幾好」及「廖偉業有料」等正面評價，反映全隊一直以來之努力，逐漸獲得球迷們的肯定。這除了靠主帥兼大旗手「大頭文」馮凱文，一直以來咬緊牙關外，全賴多名出錢出力的熱心人，包括今日《Big Boss Club》的3位主角———凱景名譽會長黃浩文、溫文灝和伍明輝。
年輕球員＋脊醫都要培育溫文灝
比黃浩文遲7年畢業的男拔舊生溫文灝（William），本身是香港註冊脊醫，名下的脊萃醫療，每場賽事都有派員到場擔任凱景軍醫。「係呀！我都係喺舊生聯賽度識『大頭文』，知道佢希望為球隊升上港超之後搵贊助商，了解咗佢嘅理念之後，我哋可以話一拍即合。（此話何解？）點講呢？年輕球員需要平台發揮自己，同樣年輕嘅脊醫都需要平台去一展所長，凱景正好畀到機會佢哋，喺唔同崗位去奮鬥。」「溫醫生」笑說。
經歷似都係由零開始
事實自身成長經歷，亦成為William支持凱景的動力，他謂：「我喺好普通嘅家庭長大，依家有少少成績，都係自己逐啲逐啲打拚番嚟，今季凱景出戰港超，亦可以話由零開始，最後無論球隊成績係點、有幾多個年輕球員踢起咗都好，呢份經歷唔係人人可以經歷到，我好想去完成佢。」除了錢和力外，William亦不時「碌人情卡」，邀請藝人朋友為凱景打氣，從而令更多人關注凱景、關注港超聯。
難忘賽事‧對理文嗰場輸得好唔抵，我哋好大機會攞到分，嗰場好多球迷支持我哋。
誠意推介‧廖偉業佢好捱得，踢右後衞好稱職，我睇好佢。
展望將來‧向前看，次循環應該可以有分落袋，贏番理文。
難忘賽事‧聯賽對傑志嘅上半場，和到0比0有晒交代啦！最後大敗無話可說，對方實力高咁多，我哋又打少兩個。
誠意推介‧曾梓軒個人好正面，場內場外態度好好，好成熟，前途無限。
展望將來‧球隊進步緊，好有信心聯賽好快會攞到分。降班膽？我唔認同喎！
由乙組撐到依家黃浩文
本身是男拔86年畢業生的黃浩文（Albert），學生時代乃全能運動健將，不僅是足球校隊成員，亦是籃球、排球和標槍高手。與「大頭文」在舊生會足球聯賽中結緣的他，3年前得知對方會組軍參戰港乙賽事，目的為年輕球員提供發揮平台後，二話不說答應支持。「當年踢乙組，錢唔係用得多，『大頭文』又好有心，成件事個構思好好，所以支持。」Albert回憶道。
「機會對後生好緊要」
目前從事抗菌品牌airDefender生意的Albert，季前明知「搞港超」跟「搞乙組」所花費天與地比，但仍決定支持，原因與其經營生意的經驗有關，他說：「做生意咁耐遇過好多上上落落，成唔成功除咗本身搏唔搏命之外，有冇機會畀你去搏都好緊要。我見好多港超球隊為咗成績，未必有空間畀到年輕球員上陣，所以覺得凱景嘅存在係有價值嘅，咁先可以畀到年輕球員搏嘅機會。」謙稱自己只是「生意仔」的Albert表示：「錢我有畀，但唔算好多，不過我會不斷幫球會去搵更多贊助，吸引更多志同道合嘅人幫手。」
難忘賽事‧聯賽對傑志嘅上半場，和到0比0有晒交代啦！最後大敗無話可說，對方實力高咁多，我哋又打少兩個。
誠意推介‧曾梓軒個人好正面，場內場外態度好好，好成熟，前途無限。
展望將來‧球隊進步緊，好有信心聯賽好快會攞到分。降班膽？我唔認同喎！
唔係乜都由商業角度去睇伍明輝
與Albert和William不同，伍明輝既不是「男拔仔」，與馮凱文亦互不認識，之前更從未入場觀看過本地波，惟他當日僅花了10秒鐘的時間，便扑錘決定支持凱景。「我係球季開咗之後先支持凱景嘅，話說有日公司開會，我提出不如贊助一隊畀好多年輕球員踢、叫凱景嘅球隊，結果會上大家只係諗咗10秒就決定咗，轉頭仲即刻開埋支票添。」本身是MMTS亞洲總裁的伍明輝笑說。
10秒扑錘贊助鼓勵追夢
MMTS乃專門為保險業提供培訓的公司，「伍會長」提到年輕球員和保險從業員，儘管兩者工作性質不同，卻同樣是追尋夢想，他說：「後生仔踢波有夢想，大家好易理解，但做保險嘅人有冇夢想呢？都有喎，搵錢係唔係夢想？係！但好多都真係希望幫到人，佢哋都好努力追佢哋嘅夢。」
可能有人會問，既然贊助得為何不選擇具爭霸本錢嘅球隊，反而選擇一支新軍？「贊助勁旅可能個商業價值大好多，但我認為個世界唔應該乜都淨係企喺商業角度去睇，如果係咁好多嘢都唔使搞。嚟緊我希望搵到更多人支持凱景，令更多年輕人無論係球員或者球隊其他崗位都好，追到屬於佢哋嘅夢！」
難忘賽事‧輸畀理文嗰場我哋係雖敗猶榮，和波合理啲，現場好多球迷都咁講。
誠意推介‧黃子俊係衝動啲，但勝在好有火，腳法又好，留放好啲就掂喇。
展望將來‧大家都見到球隊進步中，好有信心，聯賽好快會開齋！
圖/文：戴陶蔚