香港飛馬燃點青春火花

偶像布斯基斯 雷傑名做食腦防中

司職防守中場的雷傑名，以效力巴塞隆拿的防守中場布斯基斯為偶像，全因兩人身形接近：「因為我都係踢防守中場，佢同我身形相似，雖然都係單薄，但佢好識得用腦踢波！」外表文靜的「雷名」還謙稱：「我身形單薄可能比較輸蝕，不過會努力練大隻啲。」迎來首個職業球季，「雷名」期盼：「我希望菁英盃有得落場，如果有機會上陣，會盡力表現好啲。」來到一隊已有4個月，對這位小伙子來說，最難忘的一件事是季前集訓：「暫時最難忘係去泰國集訓，因為可以見識到泰國球隊嘅實力，自己喺友賽又有份上陣，覺得其他國家嘅水平都好高。」

「呢個人好勁！」 盧錦宏轉會為陳7

上季隨愉園U18征戰青年賽事的前鋒盧錦宏（Daniel），選擇加盟飛馬，除追求進步之外，還因為一個人：「我好鍾意『7哥』（陳肇麒），希望學佢踢法，可惜佢依家打番中堅。」他又透露：「因為佢係香港傳奇，冇人唔識，一開始冇睇波唔知佢係邊個，之後聽人講完，自己再上網睇佢啲片，就覺得：『嘩！呢個人好勁喎！』。後尾都有教練話我踢法有啲似佢，所以佢係我學習對象。」初嘗職業足球滋味，Daniel大嘆辛苦：「以前每星期兩課，依家幾乎每日都要練波。一開始好唔適應，練完波會頭暈，慢慢習慣呢個模式，依家都適應到。」問及本季目標時，他謂：「為球隊上陣啦，落到場就希望爭取入球。」

雷傑名	盧錦宏	吳駿發

神龍吳駿發盡快搣甩緊張

去季香港飛馬U18在甲組聯賽全季21場比賽失14球，是8隊中失球最少的一隊。為飛馬把守最後一關的門將吳駿發，今季來到職業層面，他期望能從前輩身上學習：「都知自己能力未夠，所以今季最緊要係跟『大哥』（張春暉）同『九哥』（梁興傑）學習，希望季尾有機會上陣。」對於「大哥」的肺腑之言，「阿發」更銘記於心：「春暉大哥成日同我講：『足球員嘅生涯好短暫，要好好珍惜時間，要畀自己進步快啲，做一個接到班嘅後備，畀人睇到自己係個有能力嘅龍門。』」而「阿發」最希望我改善的一環，就是心理質素：「我一到比賽就好緊張，一緊張就會慌，所以最希望自己喺呢方面進步。」

同U講Bye Bye張憙延學「企」

剛在菁英盃首輪分組賽完成職業生涯處子戰、並在該仗中交出一記助攻的張憙延（Marcus）表示：「表現算唔錯，話晒都係第一場，開頭都有啲緊張，希望下幾場有得出嘅話，可以做得更好。」從青年軍到職業隊，上季為飛馬U18隊長的他坦言分別大：「U隊速度、節奏慢好多，上到嚟一隊，頭一兩個月都跟唔到個節奏，每個人都快你幾步，你根本做唔到好多嘢，依家慢慢適應到，唔可以再好似青年賽事咁踢。」Marcus視隊友廖培楓、佐佐木周、利馬為學習對象，更希望從他們身上學懂一件事：「企位！企位好重要，無論你進攻定防守，攞每一腳波都要企位好，先會拎得好，所以我最希望自己喺呢方面進步。」

圖/文：陳焌鏗