戴歷羅斯爭氣倒戈屠牛

勇士靠杜蘭特險挫帝王

戴歷羅斯喺效力公牛時期顯露光芒，曾成為聯盟史上最年輕常規賽ＭＶＰ，可惜受傷患折磨，近年戰鬥力同上陣時間大減，佢喺上年嘅11月25號，更被爆出打算退役，原因係受唔住球迷笑佢「武功盡廢」，慶幸D.Rose未有放棄並重新證明實力。今場佢落場31分鐘，13投9中獲22分、兩個籃板同4次助攻，反觀其隊友韋堅斯正選落場竟然得0分、1個籃板同1次助攻嘅「屎爆」數據，好在唐斯有35分、22個籃板同6次助攻，木狼順利贏波。

同日衞冕嘅勇士主場117比116險勝帝王，雖然積蒙格連仲未可以復出，但杜蘭特繼續爆發狂轟44分、13個籃板同7次助攻，帶領勇士兩連勝反彈。另外火箭作客以108比117不敵騎士，由於基斯保羅輪休，就算占士夏登獲40分、4個籃板同13次助攻都無補於事。