煞科盡地一煲搶入決賽周 港隊3:10pm空襲蒙古

台北舉行的「EAFF E-1東亞足球錦標賽2019」第二圈賽事今上演小組煞科戰,上仗0比0賽和北韓的港隊,今午3時10分假台北田徑場迎擊榜末蒙古,港隊現時僅以得失球差不及榜首北韓,今仗必尋求最大勝利,希望反壓對手出線決賽周;惟北韓對東道主中華台北一仗安排於較後時間的7時10分開賽,對方可以視情況行事,形勢對港隊不利,助教郭嘉諾希望球員搶攻之餘亦要減少失球,爭取首名晉級!

港隊昨午進行了一課內容較為輕鬆的操練,對於外圍賽最後一仗面對實力較遜的蒙古,曾入場觀看蒙古首兩仗賽事的港隊助教郭嘉諾表示,港隊要把握入球機會,亦不可忽略防守︰「蒙古兩仗下半場都踢得好放膽,上半場防守可能有啲失誤導致失球,但半場後出嚟個踢法好進取,始終佢哋係戰鬥民族,輸咗波之後唔會氣餒,表現出一種唔想輸嘅精神。佢哋踢法好硬淨,而且頭兩仗下半場都入咗球好靚嘅波,假如我哋上半場爭取到入球,下半場一定要好小心,唔可以失波。」

郭嘉諾:唔止攻仲要識守

郭嘉諾續道,希望港隊可以把握高空優勢,藉着死球戰術取得更多入球︰「始終依家講緊得失球,北韓現時只係失咗1球,我哋要計得失球的話,入波之餘亦要避免失球。希望港隊呢場波踢法上進取少少,角球、罰球做好啲,因為羅素同法圖斯高度有優勢,基奧都係呢個原因畀佢踢,所以想喺呢方面攞到多啲着數,入多啲波,同時防守要硬淨,要保住不失。」

至於上仗對北韓屢救險球,期間更被對手踩傷手腕的葉鴻輝,昨日參與操練後表示受傷位置對自己影響不大,亦可如常進行練習,相信將會繼續為球隊把關。

文:何彥霆