鷹隊今季力捧超級新人控衞迪雷楊格，老將林書豪亦要擔任第6人角色，雖然迪雷楊格年紀輕輕就孭重飛，但球場外只係一塊「小鮮肉」。據八卦媒體《TMZ》報道，20歲嘅迪雷楊格最近畀隊友瘋狂惡搞，喺一次練習後，發現自己新近買入嘅Audi跑車被塞滿「一車爆谷」，當堂嚇到「O咀」！負責拍低呢次惡搞過程嘅，正正係「搞手」之一林書豪！影片中J.Lin仲好得戚咁拎咗粒爆谷品嚐：「呢啲唔係普通爆谷，係最頂級嘅爆谷呀！」
不過鷹隊喺上周六主場對活塞就慘敗109比124，主隊首節打完已落後20分，太早進入「垃圾時間」反而造就J.Lin，佢攻入全隊最高嘅19分，當中11分喺第4節「刷」出嚟。