NBA常規賽昨爆發連場大戰，雷霆主場以122比116擊退塘鵝，不過付出嘅代價頗大，王牌控衞韋斯布克喺第3節，搶籃板落地唔小心踩落安東尼戴維斯隻腳，左腳足踝落地一刻拗到90度，韋斯布克即場痛到瞓喺地上慘叫，一邊扭身一邊拍地，真係睇見都覺得痛。韋斯布克之後嘗試起身，但隻左腳痛到完全發唔到力，最後要由隊友扶入更衣室。
韋斯布克接受X光檢查後未有發現骨折，但係韌帶同肌肉有冇受傷就要進一步檢驗。韋斯布克今場傷出前拎到17分、7個籃板同9次助攻，拍擋保羅佐治就攻入全隊最高23分，成為雷霆贏波功臣。韋斯布克9月份曾接受膝部手術，缺席今季頭2場賽事，佢對上2季都錄得全季平均「三雙」嘅恐怖數據，如果要長期缺陣，對雷霆影響都好大。
同日其他賽事，火箭喺占士夏登攻入28分以及基斯保羅13次助攻帶領下，作客98比94擊敗溜馬，錄得3連勝；至於木狼雖然有戴歷羅斯繼續神勇攻入21分，但作客仍然以109比120不敵快艇。