膝傷後無復當年勇 專家：林書豪未夠班

林書豪喺今個夏天離開籃網轉投鷹隊，發現自己失去正選位置，今場比賽前佢今季平均上陣13分鐘，只得5分、2個籃板同1.3次助攻，而且命中率得38%，3分命中率更加得20%，明顯打唔出自己嘅最佳表現。

鬥公牛 籃底炒粉被block樣樣齊

今次面對公牛，林書豪喺第2節入替，雖然佢落場後連續助攻隊友射入3分，不過佢自己喺籃底炒粉，剷籃又畀人追身封阻，加上佢喺下半場起手射三分波又唔入，最後只能夠靠罰球得3分，另外有4個籃板同3次助攻。

正所謂一沉百踩，NBA專家薩克路維日前分析林書豪嘅表現時非常不客氣：「佢唔能夠喺膝傷後回復100%狀態，腳步非常沉重，冇辦法製造空間，突破好唔穩定，依家嘅佢睇落根本唔似NBA球員。」相反，拿芬有27分、11個籃板同3次助攻，帶領公牛順利贏波。